Jamie Carragher thyen heshtjen mbi kalimin e Trent Alexander-Arnold te Real Madrid – vë në dyshim motivet e tij

Futboll

Gazeta Express

27/03/2025 14:19

Legjenda e Liverpool-it, Jamie Carragher, ka dhënë mendimin e tij mbi lëvizjen e propozuar të Trent Alexander-Arnold te Real Madrid.

Real Madrid është shumë pranë nënshkrimit me Alexander-Arnold, i cili është jashtë kontrate këtë verë. Diskutimet për transferimin janë ende në vazhdim përpara një kalimi të mundshëm me parametra zero para fillimit të sezonit të ardhshëm.

Megjithatë, gjigantët spanjollë janë të gatshëm të paguajnë një tarifë për Liverpool-in në mënyrë që ta transferojnë mbrojtësin e djathtë përpara se t’i skadojë kontrata.

Ikona e Liverpool-it, Steven Gerrard, i cili dikur refuzoi një kalim te Chelsea gjatë karrierës së tij të lavdishme, ka komentuar mbi transferimin e Alexander-Arnold te Real Madrid. Ndërkohë, edhe Jamie Carragher, i cili e kaloi të gjithë karrierën e tij te Liverpool-i, ka shprehur mendimin e tij, duke vënë në dyshim motivet e lojtarit.

Ai iu referua transferimit të lirë dhe argumentoi se një rivalitet evropian me Real Madrid dhe AC Milan duhet ta kishte motivuar mbrojtësin që të vazhdonte karrierën te klubi i tij i fëmijërisë.

“Njerëzit janë të pakënaqur për disa arsye – fakti që po largohet me parametra zero ose që nuk i tregoi klubit më herët – ka tre apo katër arsye pse tifozët janë të zemëruar,” tha Carragher në episodin më të fundit të Stick to Football, program i sponsorizuar nga Sky Bet.

“Nuk jam i zemëruar që po largohet si lojtar i lirë. Në një botë ideale, Liverpool-i do të merrte 70-80 milionë paund për të dhe do t’i investonte sërish, por nuk mund t’i kesh të dyja si tifoz. Nëse Liverpool-i nënshkruan me një lojtar të lirë këtë verë, do të ishim të lumtur, kështu që a do të thotë kjo që klubi i tij i mëparshëm duhet ta urrejë atë? Gjithashtu, kur je lojtar vendas nuk i kushton asgjë klubit – largimi i Trent si lojtar i lirë është si largimi i Virgil van Dijk për 75 milionë paund, pra ende do të ishim në një bilanc pozitiv”.

“Ajo që më shqetëson është fakti që si lojtar vendas dhe tifoz i Liverpool-it, ai po largohet në një moment kur klubi është në garë për titullin e Premier League dhe Ligën e Kampionëve çdo vit. Nëse do të isha në vendin e tij, do të mendoja: ‘Ne mund të barazohemi me Manchester United në tituj të ligës, kam edhe 7-8 vite te Liverpool dhe mund të fitojmë edhe 3-4 tituj më shumë se ata, me disa Liga Kampionësh shtesë’.”

Carragher theksoi gjithashtu rëndësinë e rivalitetit evropian dhe sesi Alexander-Arnold duhet ta kishte konsideruar më shumë këtë faktor.

“Gjithmonë flasim për rivalitete, por rrallëherë i shohim ato në nivel evropian. Në një farë mënyre, Real Madrid është rival, dhe askush nuk do t’i arrijë ata – ata janë ekipi më i madh dhe më i famshëm – por unë dua që Liverpool-i të jetë i dyti në atë listë. AC Milan ka 7 tituj evropianë. Po të isha në vendin e Trent, do të mendoja se kemi një mundësi të madhe për të fituar titullin këtë vit dhe për të vendosur Liverpool-in në një pozicion më të fortë historikisht.”

A po largohet Alexander-Arnold për të ndërtuar markën e tij personale?

Kur u pyet nëse Alexander-Arnold po largohet për të ndërtuar markën e tij, Carragher u përgjigj:

“Mendoj se Trent e sheh veten pothuajse si një markë, dhe nuk është vetëm ai, por shumë lojtarë sot e shohin veten në këtë mënyrë. Kthehem te një intervistë që ai dha për Sky Sports para Krishtlindjeve, ku iu dhanë pesë opsione për të zgjedhur atë më të rëndësishmin për të – të jetë kapiten i Liverpool-it, të fitojë Ligën e Kampionëve me Liverpool-in, të fitojë Kupën e Botës me Anglinë ose të fitojë Topin e Artë – dhe ai zgjodhi Topin e Artë. Ai dëshironte të ishte mbrojtësi i parë që e fitonte këtë çmim, dhe nuk ka asgjë të keqe të kesh ambicie, por kjo nuk u prit mirë nga tifozët e Liverpool-it”. /GazetaExpress/