‘Javët Kulturore Ndërkombëtare’ nisin në Shqipëri me ngjarje të larmishme kulturore gjatë muajit shtator

Arte

Gazeta Express

07/09/2022 16:25

Projekti i JKN do të vazhdojë me programe të larmishme në fusha të ndryshme të artit dhe kulturës. Katër shtetet e para që do të rihapin sezonin e dytë të Javëve Kulturore do të jenë: Britania (1-11 shtator), Suedia (12-18 shtator), Egjipti (19-25 shtator) dhe Kina (26 shtator – 2 tetor).

Gjatë muajit shtator e në vijim çka pati e çka do të ketë në JKN janë: koncerte me muzikë klasike dhe moderne egjiptiane, performanca folklorike egjiptiane, festivali i kulturës kineze, performanca Taiji, ceremonia e çajit dhe ushqimit kinez, loja tradicionale cricket, koncerti i ABBA Tribute, si dhe koncerti i shumëpritur i këngëtares së njohur ndërkombëtarisht Rita Ora.

JKN (Javët Kulturore Ndërkombëtare) 2022 është një nismë e Ministrisë së Kulturës që sjell në Shqipëri tingujt, imazhet, aromat dhe shijet e 18 vendeve të botës. E konceptuar si një paradë kulturore ndërkombëtare, e shtrirë përgjatë gjithë vitit, JKN është vazhdimi, përfshirja dhe unifikimi nën një brand i një tradite disavjeçare të organizimit të javëve, dedikuar bashkëpunimit kulturor.

Nëpërmjet këtij projekti do të njohim më mirë dhe do të forcojmë marrëdhëniet me partnerët tanë ndërkombëtarë, si dhe do të rritim ofertën e aktiviteteve kulturore në Shqipëri për të gjitha shijet dhe moshat. JKN e shndërron skenën e aktiviteteve kulturore në vend në një arenë ndërkombëtare multikulturore dhe multidisiplinore.

Falë programit dinamik e gjithëpërfshirës, JKN do të krijojë një atmosferë të jashtëzakonshme e do të shpërndajë mesazhe të forta paqeje dhe pranimi të njëri-tjetrit.

/Gazeta Express