Jeremy Jacquet dhe gjashtë lojtarët e tjerë që Liverpooli ia ‘rrëmbeu’ Chelseat

Futboll

Gazeta Express

02/02/2026 18:00

Chelsea ka një histori të gjatë të “rrëmbimit” të lojtarëve nga Liverpooli, por çfarë ndodh kur kjo gjë ndodh në drejtimin e kundërt?

Duke qenë se Liverpooli ka fituar dy nga gjashtë titujt e fundit të Premierligës, nuk është ndonjë surprizë e madhe kur një lojtar vendos ta refuzojë Chelsean për t’iu bashkuar Liverpoolit.

Ne kemi mbledhur shtatë shembuj të lojtarëve që vendosën ta refuzojnë Chelsean dhe të zgjedhin Liverpoolin.

JEREMY JACQUET

Liverpooli ka arritur një marrëveshje me Rennes për transferimin e Jacquet për një shumë që mund të shkojë deri në 60 milionë paund.

Për ta bërë edhe më të veçantë këtë lëvizje, Chelsea kishte ofruar saktësisht të njëjtën marrëveshje, por Jacquet e ka bërë të qartë preferencën e tij mes dy klubeve.

“Ai është vërtetë një talent i madh,” e përshkroi eksperti i futbollit francez Julien Laurens për “Sky Sports”.

“E di që është vetëm 20 vjeç, nuk ka luajtur për Francën dhe nuk ka luajtur në Ligën e Kampionëve apo Ligën e Evropës. Ka ende shumë rrugë për të bërë, por ishte mbresëlënës sezonin e kaluar pasi u rikthye nga huazimi në kategorinë e dytë, dhe këtë sezon me Habib Beye. Nuk mund të gabosh me të. Ai do të jetë i jashtëzakonshëm”.

VIRGIL VAN DIJK

Nënshkrimi i Virgil van Dijk me Liverpoolin në janar 2018 është ndoshta transferimi më me ndikim në historinë moderne të klubit.

Pas finalizimit të marrëveshjes, ish-trajneri i Chelseat, Antonio Conte, pranoi se edhe skuadra e tij e kishte ndjekur mbrojtësin holandez, por Liverpooli ia doli t’i paraprijë.

“Sigurisht që ai ishte objektivi ynë, por siç e dini, ky është futbolli,” tha Conte.

“Mund të kesh shumë objektiva, por duhet të jesh në gjendje t’i arrish. Merkatoja nuk është e thjeshtë për asnjë klub”.

CODY GAKPO

Cody Gakpo refuzoi interesimin si nga Chelsea ashtu edhe nga Manchester United, përpara se të nënshkruante me Liverpoolin në vitin 2023.

“Të jem i sinqertë, spekulimet më ndikuan pak sepse ishte hera e parë që më ndodhte,” tha Gakpo për “Daily Mail”.

“Por kur dëgjova për interesimin e Liverpoolit në dimër, nuk mendova për asgjë tjetër. Ishte edhe Chelsea, ndoshta, por unë e kisha marrë tashmë vendimin.”

ALEXIS MAC ALLISTER

Duke pasur parasysh historinë e Chelseat me blerjen e lojtarëve nga Brighton, është për t’u habitur që Alexis Mac Allister nuk përfundoi në “Stamford Bridge”.

Edhe pse Chelsea dhe Manchester City tentuan ta transferonin, mesfushori argjentinas kishte sytë vetëm për Liverpoolin.

“Arsyeja pse Alexis shkoi te Liverpooli është sepse ata treguan shumë interes për ta pasur në ekip,” tha babai i tij, Carlos Mac Allister, për “Liverpool Echo”.

“Ata treguan dëshirë reale për ta pasur dhe ne donim që Alexis të shkonte në një ekip ku të ishte i qetë që nga fillimi i fazës përgatitore; të transferohej që në ditën e parë të merkatos.
Jurgen Klopp ishte një figurë kyçe në këtë transferim. Ai fliste drejtpërdrejt me Alexisin. Kur mori telefonatën nga Jurgen, kjo ishte shumë e rëndësishme për vendimin se cilin ekip të zgjidhte”.

GLEN JOHNSON

Në vitin 2009, Chelsea ishte e interesuar ta rikthente Glen Johnson, por mbrojtësi refuzoi dhe zgjodhi Liverpoolin.

“Nëse një klub si Liverpooli troket në derë, sigurisht që menjëherë tërheq vëmendjen tënde,” tha ai për “Liverpool Echo”.

“Por ajo që e bëri diferencën ishte fakti që luajtëm me Anglinë atë verë, pak para se të nënshkruaja, dhe pata një bisedë shumë të mirë me Steven Gerrard. Pastaj fola edhe me Torresin dhe Alonson. Mendova se këta ishin disa nga lojtarët më të mirë në botë. Ata nuk kishin nevojë të më telefononin, por e bënë për të më treguar sa shumë donin që t’u bashkohesha. Menjëherë u ndjeva i mirëpritur dhe gjithçka më dukej e drejtë”, tha ai.

SCOTT CARSON

Në vitin 2005, Chelsea tentoi të transferonte Scott Carson nga Leeds United, por portieri vendosi t’i bashkohej Liverpoolit.

“Chelsea ishte e interesuar për mua, por mendoja se futbolli nuk ka të bëjë vetëm me paratë,” tha Carson pas transferimit në “Anfield”.

“E di që mund të fitoja shumë më tepër atje, por ka të bëjë me të luajturin, jo vetëm me paratë. Po të kisha shkuar në Londër, do të isha harruar. Nuk do të kisha pasur asnjë shans te Chelsea”.

ALISSON BECKER

Portieri brazilian Alisson Becker refuzoi Chelsean sepse klubi nuk luante në Ligën e Kampionëve në atë periudhë.

“Zgjodha Liverpoolin për të njëjtat arsye pse zgjodha Romën kur u largova për herë të parë nga Brazili – mendova se ishte lëvizja më e mirë për karrierën time,” tha ai për revistën “FourFourTwo”.

“Chelsea po ndërronte trajner dhe nuk luante në Ligën e Kampionëve. Gjithmonë e kam admiruar historinë e Liverpoolit. Ky është një klub me pesë Kupa të Europës në vitrinë dhe unë vërtet doja të isha pjesë e kësaj historie”./GazetaExpress/