Kadrijaj: S’presim asgjë, s’kemi pasur ftesë për diskutim, Albulena Haxhiun s’e votojmë

Lajme

Gazeta Express

27/04/2025 9:37

Deputetja e AAK-së, Time Kadrijaj, tha se nuk kanë pasur ndonjë ftesë nga Lëvizja Vetëvendosje për të diskutuar rrugëdaljen nga kriza e zgjedhjes së kryeparlamentarit.

Pak para seancës konstituive, ajo tha se AAK-ja nuk ka ndryshuar qëndrim dhe se nuk do ta votojnë kandidaten Albulena Haxhiu për kryetare të Kuvendit.

“Ne nuk presim asgjë. Nuk kemi pasur asnjë ftesë. Kjo shumica duhet t’i ketë votat. Gjithë kjo klasë politike duhet të angazhohet. Klasa politike që tenton që të marrë qeverinë duhet të angazhohet ta sigurojë shumicën e thjeshtë 61 vota. Ne nuk kemi pasur ndonjë ftesë, nuk kemi ndonjë njohuri, nuk e dimë a do të jetë kandidati i njëjtë për kryetar të Kuvendit apo do të ndryshojë. Qëndrimi ynë është i njëjtë: nuk do ta votojmë kandidatën për kryeparlamentare”, tha Kadrijaj.

PDK-ja dhe AAK-ja kanë thënë se do të ishin të gatshëm ta shqyrtonin votimin e një emri tjetër nga LVV për kryetar të Kuvendit, ndërsa LDK-ja ka thënë se nuk do ta votojë asnjë emër nga kjo parti.

Kryetari i AAK-së, Ramush Haradinaj ka përmendur Saranda Bogujevcin dhe Shqipe Mehmeti Selimin si dy emra që deputetët e AAK-së do t’i votonin për kryetare të Kuvendit. Deputeti i AAK-së, Lahi Brahimaj, tha së fundmi se “mund të jetë edhe ndonjë emër tjetër” nga LVV-ja që ata do ta votonin.