Kërkohen heqjen e masës “Detyrim praqitje”, Gjykata e Lartë rrëzon kërkesën e Berishës për përjashtimin e trupës gjykuese

Shqiperi

Gazeta Express

04/04/2025 12:35

Gjykata e Lartë ka rrëzuar kërkesën e ish-kryeministrit Sali Berisha për përjashtimin e trupës gjykuese që do të shqyrtojë rekursin ndaj masës së sigurisë “detyrim paraqitjeje”. Berisha kërkoi largimin e gjyqtarëve Ilir Panda, Sandër Simoni dhe Sokol Binaj, me argumentin se ata kanë qenë pjesë e fazës së hetimit paraprak dhe kanë marrë vendime të mëparshme në dëm të tij.

Në kërkesën e tij, Berisha theksoi se:

“Kolegji Penal i Gjykatës së Lartë, i përbërë nga gjyqtarët Ilir Panda, Sokol Binaj dhe Sandër Simoni kanë qenë gjyqtarë të ‘hetimit paraprak’ dhe në këtë cilësi kanë dhënë të paktën 6 vendime, të gjitha në disfavor të kërkuesit, z.Sali Berisha. Pjesëmarrja e tyre në hetimin paraprak ka qenë e madhe, duke u shprehur për ligjshmërinë e procedurës dhe për të drejtat e mia, duke sjellë papajtueshmëri ligjore për të shqyrtuar kërkesat e mia në faza të tjera të procesit.”

Në vendimin e bërë publik, Gjykata e Lartë konfirmoi se nuk gjeti shkelje apo papajtueshmëri ligjore që do të pengonin gjyqtarët të vijojnë me shqyrtimin e çështjes. Seanca për shqyrtimin e rekursit është caktuar për datën 14 prill.

Berisha ndodhet nën masën e sigurisë “detyrim paraqitjeje” që prej 3 janarit, me vendim të gjyqtarit Engert Pëllumbi. Ai kërkon heqjen e kësaj mase, duke pretenduar se mungojnë kushtet dhe kriteret ligjore për vazhdimin e saj.