Kosova e feston Ditën e Evropës, por rruga e saj drejt BE-së është e gjatë dhe shumë sfiduese

Lajme

Gazeta Express

09/05/2023 7:20

Dita e Evropës shënohet sot edhe në vendin tonë. Që nga shpallja e pavarësisë, Kosova në vazhdimësi ka lëvizur në drejtim të integrimeve evropiane, çka edhe janë synimet e saj. Megjithëkëtë, njohës të procesit të integrimeve evropiane, vlerësojnë se rruga e Kosovës drejt anëtarësimit në Bashkimin Evropianë është e gjatë dhe mjaftë sfiduese.

Deklarata e 9 majit e vitit 1950, me të cilën kryediplomati i Francës, Robert Schuman, i bënte thirrje Francës, Gjermanisë dhe vendeve tjera evropiane për t’i bashkuar prodhimet e qymyrit dhe çelikut, vlerësohet si nisma themeltare e krijimit të asaj që sot njihet si Bashkimi Evropian. 

Data 9 maj është shpallur dhe festohet si Dita e Evropës, që nga vitit 1985, kur në Samitin e Milanos, krerët e BE-së morën vendim të tillë. 

Që nga shpallja e pavarësisë, Dita e Evropës shënohet edhe nga Kosova, e cila synon integrimet dhe anëtarësimin në Bashkimin Evropian.

Me qëllim të përafrimit, Kosova dhe Bashkimi Evropianë nënshkruan Marrëveshjen e Stabilizim Asocimit, në tetor të 2015-tës. Në maj të 2022-tës, Kosova aplikoi për anëtarësim në Këshillin e Evropës. Ndërsa, në dhjetor të të njëjtit vit aplikoi për anëtarësim në Bashkimin Evropian. 

Duke folur për Radio Kosovën, profesori i integrimeve evropiane, Dritëro Arifi, thotë se Kosova është larg integrimit evropianë. Edhe marrja e statusit të vendit kandidat për anëtarësim në BE- është proces i vështirë, thotë Arifi, që këtë e ndërlidhë edhe me shtetet mosnjohjëse. 

“Aplikimi i Kosovës ende nuk do të jetë prioritet, për shkak të mosmarrëveshjeve politike apo mosnjohjes së Kosovës nga pesë vendet anëtare të Bashkimit Evropianë. Kjo e komplikon komplet situatën. Kosova në parim i plotëson kushtet për të pasur statusin e vendit kandidat. Por, për tu integruar në BE, rruga është shumë e gjatë. Kemi të bëjmë edhe me zbatimin e ligjeve”, tha ai.

Edhe politologia Arta Tahiri-Beqa, thotë se Kosova është larg integrimit në Bashkimin Evropianë dhe organizata tjera evropiane.

“Për momentin, fatkeqësisht, nga të gjitha shtetet e Ballkanit, Kosova qëndron më së largu në fushën e integrimeve, apo të arritjeve reale drejt integrimit evropianë. Ne e festojmë Ditën e Evropës. Jemi pothuajse nga ato pak shtet që edhe e festojmë edhe nuk punojmë këtë ditë, por që, fatkeqësisht jemi shumë larg procesit të integrimit evropianë”, tha Tahiri-Beqa. 

Ndonëse Kosova është larg me integrimet evropiane, për shkak edhe të pengesave politike, 9 Maji – Dita e Evropës shënohet si festë zyrtare.