KPA konfirmon shkarkimin e prokurores së Elbasanit, Elveta Stafa (Murra)

Shqiperi

Gazeta Express

03/04/2025 19:19

Kolegji i Posaçëm i Apelimit vendosi sot shkarkimin përfundimtar nga detyra të prokurores së Elbasanit, Elveta Stafa (Murra).

Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Rezarta Schuetz relatore, Albana Shtylla, Ina Rama, Mimoza Tasi anëtare, shpalli vendimin për ankimin e subjektit të rivlerësimit Elveta Stafa (Murra) kundër vendimit të Komisionit të Pavarur të Kualifikimit

Në 23 maj 2022, KPK vendosi shkarkimin nga detyra të subjektit të rivlerësimit Elveta Stafa (Murra), prokurore në Prokurorinë e Rrethit Gjyqësor Elbasan.

Në vendimin e saj KPK argumentonte se prokurorja ka kryer deklarime kontradiktore gjatë procesit administrativ dhe duke mos iu përgjigjur saktë pyetjeve të Komisionit lidhur me pasuritë.

Po ashtu KPK vlerësoi se Stafa kishte mungesë të burimeve financiare të ligjshme për të justifikuar pasuritë dhe kryerjen e shpenzimeve për periudhën 2003 – 2016, si dhe kishte bërë deklarim të pasaktë lidhur me pasuritë e krijuara dhe burimin e ligjshëm.