Kriza e strehimit, demonstrata masive në 40 qytete të Spanjës për qiratë e banesave 

Gazeta Express

05/04/2025 21:32

Qindra, mijëra njerëz demonstruan sot në 40 qytete kundër rritjes së qirave dhe mungesës së banesave të përballueshme në një vend që gëzon rritjen më të shpejtë ekonomike në Evropë, por që vuan nga një mungesë të madhe banesash, krizë kjo e përkeqësuar më tej nga bumi i turizmit.

Qeveria e qendrës së majtë të Spanjës po përpiqet të gjejë një ekuilibër midis tërheqjes së turistëve dhe emigrantëve për të mbushur boshllëqet e vendeve të punës dhe për të mbajtur qiratë të përballueshme për qytetarët spanjollë pasi pronat me qira afatshkurtër për turistët po shtohen në qytetet kryesore dhe destinacionet bregdetare.

“Pavarësisht se kush është në qeveri, ne duhet të mbrojmë të drejtat e strehimit”, brohoritën protestuesit në Madrid, ku më shumë se 150,000 njerëz marshuan nëpër qendrën e kryeqytetit, sipas sindikatës së qiramarrësve vendas.

Qiratë mesatare janë dyfishuar dhe çmimet e banesave janë rritur me 44% në dekadën e fundit, sipas të dhënave nga uebfaqja e pronave Idealista, duke tejkaluar shumë rritjen e pagave. Në të njëjtën kohë, furnizimi me shtëpi me qira është përgjysmuar që nga pandemia e 2020.

“Po na flakin të gjithëve për të ndërtuar apartamente turistike”, tha Margarita Aizpourou, një 65-vjeçare banore e lagjes popullore Lavapies. Në bllokun ku ajo jeton, pronarët u thanë rreth 100 familjeve që jetojnë atje se qiratë nuk do të rinovoheshin.

Shoqatat e pronarëve të shtëpive dhe ekspertët thonë se rregulloret ekzistuese dekurajojnë qiratë afatgjata dhe pronarët e pronave e shohin dhënien me qira për turistët ose të huajt për ditë ose disa muaj më fitimprurëse dhe më të sigurt.

Spanja priti një numër rekord prej 94 milionë turistësh në vitin 2024, duke e bërë atë vendin e dytë më të vizituar në botë. Në të njëjtën kohë, një fluks prej mijëra emigrantësh po rrit deficitin e banesave në 500,000 shtëpi, sipas Bankës së Spanjës.

Sipas shifrave zyrtare, vetëm rreth 120,000 shtëpi të reja ndërtohen në Spanjë çdo vit, 1/6 e niveleve të para krizës në 2008, duke thelluar krizën e strehimit.

26-vjeçarja Wendy Davila theksoi se problemi nuk është i përqendruar vetëm në qendër të qytetit, pasi çmimet e qirave janë rritur “kudo”.

“Nuk mund të jetosh në Madrid duke ndarë një banesë me katër persona të tjerë“, tha ajo.