Kryediplomati britanik ishte dje në Kosovë, çfarë mesazhe la

Lajme

Gazeta Express

03/04/2025 7:31

Ambasadori i Mbretërisë së Bashkuar në Kosovë, Jonathan Hargreaves, ka bërë një përmbledhje të mesazheve që ka lënë kryediplomati britanik David Lammy, gjatë vizitës dje në Kosovë.

Hargreaves, është shprehur se Lammy ka reflektuar “se qëllimi i Tony Blair ishte që Kosova të jetë në gjendje të formësojë të ardhmen e saj, të bashkëjetojë në mënyrë paqësore me fqinjët e saj dhe të mbrojë diversitetin e qytetarëve të saj. Ky mbetet synimi ynë sot, ndërsa ne përpiqemi për një normalizim të qëndrueshëm dhe paqësor të marrëdhënieve ndërmjet Kosovës dhe Serbisë”.

Ai shprehet se Mbretëria e Bashkuar do të punojë që të ketë përparim në dialogun Kosovë-Serbi.

“Sekretari i Jashtëm shfaqi shpresën se qeveria e ardhshme e Kosovës do t’i adresojë të gjitha nevojat e qytetarëve, duke përfshirë përparimin në integrimin e serbëve të Kosovës dhe angazhimin fuqishëm në dialogun e lehtësuar nga BE-ja. Mbretëria e Bashkuar do të punojë së bashku me BE-në për të siguruar që ne të kemi përparim që funksionon për popullin e Kosovës dhe Serbisë”.

Gjithashtu, shpreson që Kosova të bëhet anëtare në KiE.

“Mbretëria e Bashkuar pa mëdyshje mbështet anëtarësimin e Kosovës në Këshillin e Evropës dhe shpreson se ajo mund të përmbushë shpejt kërkesat tjerëva. Ne jemi gjithashtu jashtëzakonisht krenarë për kontributin tonë të rëndësishëm në KFOR, një element thelbësor i sigurisë së Kosovës. Sekretari i Jashtëm dhe Presidenten Osmani diskutuan për zhvillimin e një marrëdhënieje më të thellë dhe më të strukturuar MB-Kosovë në muajt në vijim”, shkruan tutje Hargreaves.

Për fund ai tha se “ishte e mrekullueshme që Dame Karen Pierce, e dërguara e re speciale e Mbretërisë së Bashkuar në Ballkanin Perëndimor, iu bashkua Sekretarit të Jashtëm. Mezi presim ta mirëpresim sërish në Kosovë së shpejti dhe udhëheqjen e saj në Samitin e Procesit të Berlinit, të cilin  Mbretëria e Bashkuar do ta mirëpresë këtë vjeshtë”.