Ky raportohet se është i dyshuari për sulmin vdekjeprurës në xhaminë franceze, u arrestua në Itali  

Lajme

Gazeta Express

28/04/2025 9:44

Një burrë i dyshuar për vrasjen e një besimtari mysliman në një xhami në Francën jugore është dorëzuar te policia në Itali, thanë autoritetet të hënën.

Policia franceze ka nisur kërkimin për një të dyshuar pas sulmit që ndodhi të premten në ish-qytetin minerar La Grand Combe.

Sulmuesi, sipas raportimeve të mediave lokale, e filmoi sulmin me një telefon celular dhe kamerat e sigurisë e regjistruan atë duke bërtitur fyerje kundër Zotit.

Ministria e Brendshme Franceze tha se i dyshuari i ishte dorëzuar policisë në Itali, pa dhënë detaje të mëtejshme, raportoi France 24.

Prokurori vendas Abdelkrim Grini tha se hetuesit po shqyrtojnë mundësinë që ky të ketë qenë një akt islamofobik: “Kjo është hipoteza e parë mbi të cilën po punojmë, por nuk është e vetmja”, tha ai.

Sipas prokurorit, i dyshuari ka lindur në vitin 2004 në Francë, ka jetuar në atë zonë dhe nuk kishte precedentë të mëparshëm penalë.

“Racizmi dhe urrejtja e bazuar në fe nuk do të kenë kurrë vend në Francë”, tha Presidenti Emmanuel Macron, duke theksuar se liria fetare është e paprekshme.

Xhamia e Madhe e Parisit e dënoi sulmin dhe tha se viktima, një i ri i identifikuar vetëm si Aboubakar nga mediat franceze, sapo kishte mbaruar pastrimin e xhamisë kur u vra.

Në mbështetje të viktimës, të dielën u mbajt një marshim në La Grand Combe, ndërsa në Paris u organizua një tubim kundër krimeve të urrejtjes kundër myslimanëve.