Lushnjë/ Hajdutët tentojnë të vjedhin një biznes, por gjatë arratisjes përfundojnë në kanal

Shqiperi

Gazeta Express

31/03/2025 13:41

Plani i hajdutëve në Lushnjë është ndërprerë në mënyrë spektakolare, pasi tentativa e tyre për të vjedhur një thertore në fshatin Golem përfundoi me një aksident. Sipas njoftimit të Policisë së Lushnjës, ngjarja ka ndodhur gjatë orëve të para të mëngjesit të datës 31 mars, kur autorët kanë grabitur një biznes në pronësi të shtetasit A.K., ku kanë marrë një kasafortë me para dhe furgonin e përdorur për transport.

Pas vjedhjes, hajdutët janë larguar me shpejtësi, duke u përpjekur të shmangin kapjen nga autoritetet. Ata kanë zgjedhur një rrugë dytësore, por gjatë arratisjes, furgoni ka dalë nga rruga dhe ka përfunduar në kanal, duke i detyruar ata të braktisin automjetin dhe të largohen me një mjet tjetër. Policia ka mbërritur shpejt në vendngjarje dhe ka gjetur furgonin e braktisur, ku është sekuestruar dhe kasaforta e vjedhur, ende e pa hapur.

Sipas burimeve nga policia, janë marrë pamjet nga kamerat e sigurisë për të rindërtuar dinamikën e ngjarjes dhe për të identifikuar autorët. Policia e Lushnjës ka shoqëruar dy persona për inkriminim të mundshëm dhe po vazhdon hetimet për të kapur ata që qëndrojnë pas këtij akti kriminal.