Man City flet për lëndimin e Erling Haaland, derisa ai largohet me paterica pas fitores në FA Cup

Futboll

Gazeta Express

01/04/2025 10:59

Manchester City ka konfirmuar shkallën e plotë të dëmtimit që Erling Haaland pësoi gjatë fitores 2-1 në çerekfinalen e FA Cup kundër Bournemouth të dielën.

Skuadra e Pep Guardiolës përmbysi rezultatin pasi Evanilson kaloi Cherries në avantazh në Vitality Stadium, me golat e Haaland dhe Omar Marmoush që i siguruan fitoren City-t.

Megjithatë, fitorja u zbeh disi nga një dëmtim i dukshëm në kyçin e këmbës që Haaland pësoi në pjesën e dytë.

Norvegjezi u pa me paterica dhe duke mbajtur një çizme mbrojtëse pas ndeshjes, por në atë moment nuk kishte ende informacion mbi seriozitetin e dëmtimit.

Tani City ka konfirmuar se Haaland ka pësuar një dëmtim në kyçin e majtë të këmbës dhe 24-vjeçari do të konsultohet me një specialist për të përcaktuar diagnozën e plotë.

Klubi deklaron se “pret” që Haaland të rikthehet para fundit të sezonit 2024/25, por nuk ka konfirmuar ende një datë të saktë të rikthimit.

Deklarata e klubit thotë:

“Erling iu nënshtrua testeve fillestare në Manchester të hënën në mëngjes dhe tani do të konsultohet me një specialist për të konfirmuar shkallën e plotë të dëmtimit. Vlerësimet vazhdojnë për të përcaktuar diagnozën përfundimtare. Pritet që Erling të jetë i gatshëm të luajë një pjesë të mbetur të këtij sezoni, përfshirë FIFA Club World Cup këtë verë.”

Ky dëmtim mund të jetë një goditje e rëndë për City-n, i cili po lufton për të siguruar një vend në top katërshe – ose top pesëshe, në varësi të renditjes së UEFA-s – për të siguruar pjesëmarrjen në Ligën e Kampionëve sezonin e ardhshëm.

Skuadra e Guardiolës tashmë është eliminuar nga Europa pas disfatës ndaj Real Madrid në fazën play-off, që do të thotë se tani mund të përqendrohet vetëm në garat vendase.

City aktualisht mban vendin e pestë, por ka vetëm katër pikë më shumë se Bournemouth, që renditet në vendin e 10-të.

Newcastle, i gjashti me një pikë më pak, gjithashtu ka një ndeshje më shumë për të luajtur, pasi fitoi finalen e Carabao Cup kundër Liverpool-it para ndërprerjes së fundit ndërkombëtare. /GazetaExpress/