“Mburoja e Akilit”, plani i ri grek për mbrojtjen me vlerë 25 miliardë euro.

Lajme

Gazeta Express

03/04/2025 12:14

Kryeministri grek Kyriakos Mitsotakis nga foltorja e parlamentit ka paraqitur një plan të ri dymbëdhjetëvjeçar me vlerë 25 miliardë euro për fuqizimin e Forcave të Armatosura të vendit, duke e konsideruar atë si transformimin më drastik të tyre në historinë moderne dhe si investim në aftësitë mbrojtëse për sovranitetin e Greqisë.

Mitsotakis i është referuar kërcënimit që vjen nga pushtimi rus në Ukrainë, arkitekturës së re evropiane të sigurisë, rigjallërimit të konfliktit në Lindjen e Mesme, si dhe tarifave të reja nga SHBA, duke theksuar se harta botërore e interesave gjeopolitike po riorganizohet në mënyrë dramatike.

“Me këto fakte të reja, zgjedhjet strategjike të vendit tonë bëhen absolutisht kritike, aq më tepër kur nga njëra anë perceptimi mbrojtës i lidershipit të ri të SHBA duket se ndryshon nga roli i NATO-s dhe nga ana tjetër kur planet ekonomike të kësaj superfuqie duket se devijojnë nga një kornizë e tregtisë së lirë që ka ekzistuar deri më tani”, raporton TopChannel.

Duke paraqitur disa prej hollësive të këtij plani të ashtuquajtur “Mburoja e Akilit”, Mitsotakis dhe më pas Ministri i Mbrojtjes Kombëtare, Nikos Dhenidas, kanë shpjeguar se bëhet fjalë për një kupolë e cila kombinon mjetet ekzistuese të mbrojtjes ajrore me aftësitë e reja që do të jenë në gjendje të mbrojnë në pesë nivele: me sistemet anti-dron, antiraketë, kundërajror, anti-anije dhe anti-nëndetëse.

Mitsotakis u tha ligjvënësve se Greqia, që shpenzon pak më shumë se 3% të prodhimit të brendshëm bruto për mbrojtjen, si vend anëtar i NATO-s nderon aleancën strategjike me SHBA, por në të njëjtën kohë, si vend i BE, duhet të jetë një krah qendror i strategjisë evropiane të mbrojtjes në shekullin e 21-të.