Memli Krasniqi në  dy vjetorin e Marshit për Drejtësi: Ata do të kthehen ashtu siç shkuan – të lirë dhe të pafajshëm

Lajme

Gazeta Express

02/04/2025 11:24

Kryetari i PDK’së, Memli Krasniqi, ka përkujtuar sot dyvjetorin e Marshit për Drejtësi, ku shumë qytetarë u mblodhën në Prishtinë për të kërkuar drejtësi për ish-krerët e UÇK’së, të cilët po përballen me një proces gjyqësor në Hagë.

Në një postim të shoqëruar me pamje nga ajo ditë, Krasniqi tha se ky marshim ishte një dëshmi e bashkimit popullor për të mbrojtur të vërtetën historike dhe për të kundërshtuar padrejtësinë ndaj Hashim Thaçit, Kadri Veselit, Jakup Krasniqit, Rexhep Selimit dhe shokëve të tyre.

“Ishte një ditë e mbushur me krenari, dhembje dhe vendosmëri – sepse kur padrejtësia bëhet ligj, qëndresa bëhet detyrë,” shkroi ai.

Kryetari i PDK-së shprehu besimin e tij të plotë në pafajësinë e tyre dhe theksoi se drejtësia vonon, por nuk mungon.

“Pas një sage të gjatë, besojmë se ata do të kthehen ashtu siç shkuan – të lirë dhe të pafajshëm!”