Mickoski-Filipçe “kokë më kokë”, pa liderët shqiptarë!

Maqedoni

Gazeta Express

02/04/2025 15:38

Vazhdojnë reagimet e partive politike për tragjedinë në Koçan. Përderisa partitë politike shqiptare shkëmbejnë polemika njëra me tjetrën, liderët e partive më të mëdha maqedonase nëpërmjet mediave dakordohen për mbajtjen e një takimi tet-a-tet në të cilin pritet të diskutohen shumë çështje. BDI pyet – kush i trembet formimit të Komisionit Hetimor në Kuvend me pjesëmarrjen e të gjitha partive politike dhe monitorimit ndërkombëtar nga OSBE, SHBA dhe Bashkimi Evropian? Tragjedia e Koçanit zbuloi të vërtetën për skllavërimin e plotë të shtetit, thonë nga BDI. Sipas partisë me seli në Reçicë të Vogël, qëveria jo vetëm që nuk parandaloi një katastrofë, e cila ka qenë e njohur për institucionet kompetente gjatë gjithë vitit, por edhe e keqpërdori sistemin për të mbrojtur ata që janë përgjegjës.

“Fillimisht, me presion politik mbi Prokurorinë – përmes kërcënimeve ndaj prokurorit nga aktivistët partiakë në rrugë, pastaj me iniciativë për shkarkimin e tij, për të përfunduar me premtimin për ta mbajtur në detyrë nëse luan sipas rregullave të diktuara. Përveç kësaj, qeveria ushtroi presion mbi mediat, shoqërinë civile dhe të gjitha zërat kritikë, duke e shndërruar shtetin në një mjet partiak për amnistimin e fajtorëve. Pas tragjedisë, në vend të një përgjigje institucionale, jemi dëshmitarë të një drejtësie selektive – një përpjekje për të transferuar përgjegjësinë te të tjerët, pa një hetim për ata që ishin vërtet përgjegjës për parandalimin”, theksojë nga BDI.

Integristët vlerësojnë se dy javë pas tragjedisë, Parlamenti nuk gjeti forcën as të mbajë një seancë komemorative, sepse kontrolli partiak mbi institucionet është më i fuqishëm se përgjegjësia morale dhe shoqërore. BDI i bën thirrje deputetëve të dëgjojnë ndërgjegjen e tyre, të mendojnë për familjet e viktimave, për besimin në sistem, dhe të nënshkruajnë kërkesën e Frontit Evropian për krijimin e një komisioni hetimor në Parlament. “Drejtësia selektive do të jetë një burim i besimit të humbur dhe deformimit të sistemit në të ardhmen. BDI mbetet e angazhuar për të vërtetën, transparencën dhe drejtësinë – dhe nuk do të lejojë që kjo tragjedi të mbyllet pa një hetim të plotë me vëzhgim ndërkombëtar”, thonë nga BDI.

Ndaj qëndrimeve të BDI-së reagojnë nga VLEN, duke thënë se partia e Ali Ahmetit po luan rolin e viktimës përpara kamerave, ndërsa tentojnë të mashtrojnë popullatë, duke dorëzuar nismë për komision hetimor me vetëm 16 deputetë, ndërkohë që Kushtetuta kërkon së paku 20.

“Ose nuk e dinë Kushtetutën, ose thjesht duan shou mediatik! E vërteta është e thjeshtë: BDI nuk e ka hallin e Kreshnik Bekteshit, as të drejtësisë për Koçanin. Ata qajnë vetëm për një gjë – vëmendjen që po u ikën çdo ditë! Madje, nuk janë në gjendje as ta konsolidojnë grupin e vet parlamentar, të ashtuquajturin “Front Evropian”. Nga 18 deputetë që ka ky lloj Fronti arritën të sigurojnë vetëm 16 firma – kjo flet më shumë se çdo deklaratë për gjendjen e brendshme në këtë grupim. Kur s’mund t’i bindin as deputetët e vet, si mund të kërkojnë drejtësi publike?”, theksojnë nga VLEN.

Nga koalicioni në pushtet theksojnë se si rezultat I panikut, BDI është e gatshme ti bojkotojë zgjedhjet lokale dhe të shkaktojë krizë politike, vetëm për të shpëtuar vetveten dhe për të shmangur përgjegjësinë që po e afrohet. VLEN përsëritën qëndrimin se ata do të kërkojnë komision hetimor për të gjitha tragjeditë.

Ndërkohë, kryetari i LSDM-së, Venko Filipçe ka njoftuar temat që mund të fliten në takimin e liderëve, të cilin ai propozon që të mbahet mes krerëve të partive më të mëdha në vend. Arsimimi, shëndetësia, drejtësia, mbrojtja e mjedisit dhe partizimi në institucione janë pesë fushat që lideri i LSDM-së, Venko Filipçe, njoftoi se do të jenë në fokus të takimit liderësh të partive politike, që ai e nisi kohët e fundit. Ai tha se tragjedia në Koçani i ka bërë të vetëdijshëm për dobësitë sistematike dhe se është koha që të gjithë aktorët politikë të fillojnë të punojnë së bashku për të mirën e shtetit.

“Sistemi duket se nuk funksionon siç duhet në shumë drejtime, shërbimet publike nuk kanë performancën që qytetarët realisht e meritojnë dhe për këtë janë përgjegjëse të gjitha partitë politike: LSDM, VMRO-DPMNE, BDI, partitë tjera të shqiptarëve dhe partitë e tjera. Mendoj se, duke e dëgjuar këtë alarm dhe kërkesat e qytetarëve, është e nevojshme të krijohet një sistem, një formë e re e dialogut politik dhe shoqëror, ku do të përfshihen të gjitha partitë politike, para së gjithash më të mëdhatë dhe sigurisht aktorët e tjerë në shoqëri, me qëllim që të përgatiten dokumente strategjike mbi të cilat do të krijohet një strategji, e cila do të sigurojë funksionimin e shtetit për më shumë se një dekadë, një dekadë e gjysmë ose dy dekada – shumë më tepër se mandati i çdo qeverie apo partie ose koalicioni që do ta udhëheqë. Në disa fusha, është e qartë se duhet të dimë se ku po shkojmë”, deklaroi lideri i LSDM-së në konferencën e sotme për media.

Filipçe justifikoi revoltën dhe zemërimin e qytetarëve, pasi, siç tha ai, ajo që quhet reforma dhe kalim në tranzicion, duket se nuk ka dhënë rezultatet e dëshiruara për më shumë se tre dekada. Lideri i LSDM-së mendon se fillimisht duhet të zhvillojë një takim “kokë më kokë” me kryeministrin Hristian Mickoski, pasi, siç tha ai, ai ka tendencën të jetë i pari që ka shtruar dorën dhe ka thënë se takimi është i pranueshëm. Më vonë, do të pasonte një takim me liderët e partive parlamentare.

“Unë do të kërkoj takim që sot ose nesër, në përputhje me agjendat, për ta organizuar këtë takim. Tani, e kam dhënë një shpjegim më të detajuar dhe shpresoj që kur partitë politike ta dëgjojnë këtë, ato do ta pranojnë këtë takim liderësh, por është mirë që fillimisht ta diskutojmë me kryeministrin, duke marrë parasysh se ai ishte i pari që shtriu dorën dhe tha se takimi është i pranueshëm. Vërtet, nuk e di se çfarë nga ajo që po them si koncept do të ishte e papranueshme ose ndokush nuk do të donte të bisedonte, kur kjo është një konstatim i çdo qytetari në shtet“, tha Filipçe.

Në takimin “kokë më kokë” me kryeministrin, siç tha ai, duhet të shqyrtohen temat, dhe më pas, mënyra ose metodologjia se si, nëse bien dakord për këto tema, do të punojnë dhe do t’i zbatojnë në praktikë.

Nga ana tjetër, kryeministri Mickoski u tregua i gatshëm që të ulet në takim me kryetarin e LSDM-së Filipçe.

“Jam në dispozicion në çdo kohë, do ta rishpërndaj orarin tim, nëse është e nevojshme në mesnatë, pas mesnate, për të dëgjuar planin e tij dhe të shohim nëse diçka mund të zgjidhet sipas atij plani. Por, nëse plani përfshin një qasje të ngjashme me atë që ishte në të kaluarën gjatë koronavirusit, atëherë unë nuk mund të pranoj plane të tilla“, deklaroi kryeministri duke iu përgjigjur pyetjeve të gazetarëve. Mickoski mendon se është e pahijshme që për këtë të diskutohet përmes mediave, pasi, siç tha ai, kjo është një temë serioze dhe për një temë serioze duhet të ulesh dhe të diskutosh ballë për ballë. “Nëse ka një plan, jam i gatshëm ta pranoj për një takim presidentin e LSDM-së për ta shpjeguar planin, për ta dëgjuar atë. Kohë serioze janë, unë jam një njeri serioz, janë çështje serioze dhe më së paku që duhet të bëhet është të bëhet një shfaqje publike“, shtoi Mickoski. (koha.mk)