Ministri Çeku s’i bindet deklaratës së FFK-së: E qartë, ka ndodhur largimi i flamurit të Kosovës në Beograd, Federatat i kemi udhëzuar që t’i lëshojnë ngjarjet në këso raste

Sport

Gazeta Express

03/04/2025 19:29

Minisitri i Kulturës, Rinisë dhe Sportit të Republikës së Kosovës, Hajrulla Çeku ka reaguar ashpër në lidhje me skandalin që ndodhi në kongresin e UEFA-s me flamurin e Kosovës.

Ministri Çeku nuk i është bindur deklaratës së Federatës të Futbollit të Kosovës, e cila çuditi me një komunikatë, duke thënë se simbolet e Kosovës nuk janë hequr nga Kongresi i UEFA-s.

Ministri Çeku thotë se është e qartë se simbolet e Kosovës janë larguar.

“Duhet të sqarojmë atë që është e qartë. Ka ndodhë largimi i flamurit, sepse kjo shihet nga pamjet. Si veprim i papranuar, i dënuar, praktikë e vazhduar e Serbisë në ngjarjet sportive, duke pamundësuar pjesëmarrjen e Kosovës. Ky vendim është kundër rregullave te UEFA-s. Kjo ngjarje është e UEFA-s. Presim sqarime nga UEFA. Presim përgjigje zyrtare se kush e si e ka bërë e pse është toleruar. Presim vendime konkrete ndaj atyre që e kanë bërë këtë veprim. Serbia nuk e kursen as sportin për të shpërfaqe sjelljet e saj shoviniste. Ky është veprim skandaloz që e cenon integritetin e shtetit të Kosovës”, tha Çeku për emisionin “Gazeta” në “Kanal10”.

Ai tha po ashtu se për këso vendime ekzistojnë edhe procedura që duhet të ndiqen.

“Këto jane detaje që do të na sqarojë UEFA-ja, edhe vendosja edhe largimi i simboleve do te duhet te ndjeke një procedurë standarde te logjistikës së atij organizimi. Mirëpo, ne kemi fotografitë, që tashmë janë publike, ku në tavolinë nuk është flamuri i Kosovës derisa shihen flamujt e shteteve të tjera. Nëse ka ndodhur në përfundim ose pas përfundimit, megjithatë nuk ka logjikë që një herë të largohet vetëm flamuri i Kosovës dhe të bëhen disa fotografi e pastaj të vazhdohet me të tjerat. Këtë unë mendoj se e ka bërë Federata e Serbisë, por kjo nuk e redukton përgjegjësinë, pasi kjo nuk ka qenë ngjarje e federates serbe, por organizim i UEFA-s”, tha Çeku për emisionin “Gazeta” në “Kanal10”.

Po ashtu, në prononcimin për “Kanal10”, ministri tha se shteti i ka udhëzuar qysh më herët të gjitha federatat sportive të Kosovës, që t’i lëshojnë ose të tërhiqen nga çdo aktivitet sportiv – çfaredo qofshin ato – nëse pala kosovare nuk trajtohet njësoj sikurse pjesëmarrësit e vendeve të tjera, shkruan “Gazeta Express”.

“E kemi një politikë që e kemi komunikuar me gjitha federatat. Kudo që ndodhin ngjarjet sportive në botë, pjesëmarrje duhet të ketë vetëm me simbolet tona shtetërore. Pa simbole, nuk ka pjesëmarrje. Largimi i simboleve, do të thotë largimi i sportistëve të Kosovës”, deklaroi ai.

Siç dihet, prezent ne Kongresin e UEFA-s, deri në fund të punimeve, kanë qenë përfaqësuesit e FFK-së, kryetari Agim Ademi dhe u.d sekretarit, Markus Weidner./GazetaExpress/