Misetic: Provat e Speciales kundër Hashim Thaçit janë të dobëta, jam optimist dhe duhet të kemi aktgjykimin sa më shpejt

Lajme

Gazeta Express

02/04/2025 15:08

Avokati mbrojtës i ish-presidentit Hashim Thaçi, kroati Luka Misetic, në një intervistë të përbashkët për mediat e Kosovës, ka folur për procesin e gjykimit që po vazhdon tash e gati pesë vite në Hagë. Misetic ka thënë se është i zhgënjyer që ish-krerët e UÇK-së po mbahen kaq gjatë në paraburgim, meqë janë katër vite e gjysmë jetë të cilat s’mund t’i kthesh kurrë mbrapa.

“Së pari më lejoni të them se klientët tanë janë mbajtur në paraburgim për një kohë jashtëzakonisht të gjatë, 4 vjet e gjysmë në paraburgim, 4 vjet e gjysmë të cilat nuk mund t’i kthejnë kurrë mbrapa. Jam i zhgënjyer që u deshën 2 vjet e gjysmë që çështja e Prokurorisë të përfundonte, besoj se kjo çështje mund të përfundonte shumë më shpejt por jemi ku jemi tani”, ka thënë Misetic.

Megjithatë avokati kroat ka thënë se provat e Prokurorisë ndaj Hashim Thaçit janë shumë të dobëta dhe Misetic shprehet optimist për epilogun që do të ketë procesi kundër Hashim Thaçit.

“Në përgjithësi mendoj se ky rast dhe provat kundër Z. Thaçi kanë qenë shumë të dobëta. Nuk mund të flas për provat tani por mendoj se në fund të gjykimit do të shihni se pretendimet që nisën me raportin e Martyt nuk kanë thuajse asnjë lidhje me provat e paraqitura kundër Z. Thaçit në këtë gjykim për mbi 2 vjet. Në këtë kuptim jam shumë optimist për rezultatin që del nga ky rast, për Z. Thaçi, mendoj se provat kanë qenë shumë të dobëta dhe patjetër se do t’i argumentojmë këto para Trupit Gjykues në kohën e duhur”, ka thënë Misetic.

 Ai ka thënë se e vetmja gjë që ka mbetur tani është që të shkohet drejt procedurave të tjera të mbetura dhe të merret aktgjykimi sa më shpejt të jetë e mundur.

“Siç dihet nuk mund të jap komente rreth asaj që është thënë në seanca private, nuk mund ta komentoj por mund të ju them se nëse flas në përgjithësi, për mendimin tonë provat kundër Z. Thaçi janë jashtëzakonisht të dobëta deri në atë pikë që nganjëherë gjatë procesit e kam pyetur veten “pse është akuzuar Z. Thaçi?”. Do t’i dorëzojmë parashtresat tona Trupit Gjykues në kohën e duhur por nuk ka shumë gjëra që mund të them për prova specifike të rastit, por jemi të bindur për rezultatin për Z. Thaçi dhe e vetmja gjë që ka mbetur tani është të kalojmë nëpër fazat tjera të procesit sa më shpejt dhe ta kemi aktgjykimin sa më parë të jetë e mundur”, ka shtuar tutje ai.

Lidhur me dëshmitarët, Misetic ka thënë se mbrojtja ka dëshmitar për të cilët mendon se janë tejet efektiv, megjithatë ka thënë se s’mund të flasë në detaje.

“Epo ka dëshmitarë të tillë, disa prej tyre kanë dëshmuar në seanca publike për të cilët mendoj se gjatë kundër pyetjeve kanë qenë dëshmitarë shumë efektiv për Mbrojtjen, për Z. Thaçi. Sërish nuk do ta komentoj specifikisht ndonjë dëshmitar tani, edhe po të ishte në seancë publike, sepse do t’i dëgjoni të gjitha këto argumente në kohën e duhur, por mendoj se çështja e cila është paraqitur nga ana e Z. Thaçi në fjalën hyrëse rreth rolit të tij në Ushtrinë Çlirimtare të Kosovës është vërtetuar përgjatë çështjes së Prokurorisë dhe tani neve na ka mbetur vetëm t’i argumentojmë këto para Trupit Gjykues. Kemi besimin se Trupi Gjykues e ka të njëjtën përshtypje për këtë rast sikur që e kemi ne dhe do ta presim aktgjykimin. Nëse ka drejtësi këtu, besoj se do të ketë rezultat shumë të mirë për Z. Thaçi në fund të krejt kësaj”, ka shtuar avokati kroat.

Ai ka thënë se Prokuroria ka dështuar që të paraqes fakte të mjaftueshëm në disa pjesë të caktuara të aktakuzës.

“Ne do t’i shtrojmë argumentet tona mbi atë se Prokuroria nuk ka arritur të dëshmojë apo të sjellë prova të mjaftueshme për disa pjesë të caktuara të dosjes së tyre, tani nuk mund të jap detaje sepse nuk është as vendi e as koha e duhur, do ta bëjmë këtë brenda gjykatores, por po, ne besojmë që Prokuroria ka dështuar të paraqes fakte të mjaftueshme për pjesë të caktuara të aktakuzës”, ka deklaruar avokati kroat, Luka Misetic./GazetaExpress/