Moti i keq godet Kukësin: Borë, reshje dhe temperatura të ulëta

Shqiperi

Gazeta Express

06/04/2025 12:55

Qarku i Kukësit është përfshirë nga një mot i ashpër që ka sjellë reshje të dendura shiu dhe dëbore, shoqëruar me ulje të ndjeshme temperaturash dhe erëra të forta. Në zonat mbi 600 metra mbi nivelin e detit, reshjet e shiut janë shndërruar në borë, duke krijuar një shtresë deri në 5 centimetra në disa prej fshatrave malorë.

Megjithë kushtet e vështira atmosferike, autoritetet lokale raportojnë se nuk ka pasur probleme në qarkullimin rrugor në zonat e thella si Arrën, Shishtavec, Kalisë, Gryk Çajë, Zapot, Topojan, Kishaj, Cahan, Valbonë dhe Dragobi.

Ndërkohë, është lëshuar një thirrje për kujdes të shtuar për drejtuesit e automjeteve, veçanërisht në disa segmente rrugore të prekura nga akulli dhe rënia e gurëve:

• Kam – Qafë Luzhë
• Ura e Topojanit – Shishtavec
• Kolosjan – Bushtricë – Kala e Dodës
• Kalimash – Qafë Shllak – Qafë Mali

Këto akse janë më të rrezikuarat për shkak të terrenit të thyer dhe kushteve të motit, ndërsa strukturat përgjegjëse të emergjencave dhe autoritetet rrugore po mbajnë nën vëzhgim situatën në terren.

Drejtuesit e automjeteve janë këshilluar të përdorin goma dimërore dhe zinxhirë në zonat me borë dhe të shmangin udhëtimet e panevojshme gjatë orëve të natës ose në orët kur temperaturat janë më të ulëta. Policia Rrugore dhe shërbimet e emergjencës janë në gatishmëri për çdo rast ndërhyrjeje.