Mungon njëra e akuzuar, dështon seanca për përvetësimin e mbi 70 mijë eurove

Lajme

Gazeta Express

02/04/2025 11:15

Në mungesë të të akuzuarës Fatime Hoti-Abazi, ka dështuar të mbahet seanca të mërkurën në Gjykatën Themelore në Prishtinë, në rastin ku e njëjta bashkë me Fllanza Shabin akuzohen për përvetësim në detyrë.

Ato akuzohen se në cilësinë e zyrtareve të PTK-së, gjatë periudhës 2009-2012 kishin përvetësuar shumën prej 76 mijë e 151 euro e 16 centë, e cila u ishte besuar për shkak të pozitës së tyre për shërbimet e  “Western Union” në Postën e Kosovës, raporton “Betimi për Drejtësi”.

Kryetari i trupit gjykues, gjyqtari Agim Kuçi njoftoi se e akuzuara Hoti-Abazi me parashtresë ka njoftuar Gjykatën se nuk mund të jetë e pranishme në seancë për shkak se ka rast vdekje.

Andaj, në mungesë të kushteve ligjore për mbajtjen e seancës, gjyqtari Kuçi të radhës e caktoi për një datë tjetër.

Ndryshe, sipas aktakuzës së përpiluar më 13 gusht 2018, e akuzuara Fllanza Shabi, në cilësinë e zyrtares së shitjes së PTK-së në Prishtinë, në zyrën postare nr.10 dhe Fatime Hoti-Abazi, si zyrtare e teleshitjes në PTK, akuzohen se me qëllim që të përfitojnë çfarëdo dobie për vete apo për tjetrin, duke shfrytëzuar detyrën apo autoritetin zyrtar i kishin tejkaluar kompetencat e tyre.

Gjithnjë sipas akuzës, të akuzuarat në periudhën 2009-2012, kanë përvetësuar shumën e parave prej 76.151,16 euro, e cila i ishte besuar për shkak të detyrës apo pozitës së tyre për shërbimet e “Western Union”, në Postën e Kosovës.

Prokuroria pretendon se një mungesë të tillë të të hollave e ka zbuluar Auditori i Brendshëm i Postës dhe Komisioni për verifikimin e kërkesave të hapura në zyra postare për shërbimet e “Western Union”.

Me këto veprime, Prokuroria i ngarkon të akuzuarat se në bashkëkryerje kanë kryer veprën penale “Përvetësimi në detyrë”, e sanksionuar sipas nenit 425, par.3 lidhur me nenin 31 të Kodit Penal.