Nga Kolumbia në Tiranë, goditet rrjeti i prostitucionit, arrestohen eskorta ruse e spanjolle

Shqiperi

Gazeta Express

30/09/2022 12:13

Goditet një rrjet prostitucioni në Tiranë, me organizatore një shtetase kolumbiane. Policia e Tiranës njofton se bashkë me tutoren kolumbiane janë arrestuar edhe 6 shtetase të tjera të huaja, që kishin ardhur në Shqipëri për të ushtruar prostitucion. Në pranga kanë rënë Lismar Maryelis John Perez, Leidi Yaritza Anillo Bolano, Yuri Lorena Vargas Sanchez, Beisi Yusmar Rojas Ruiz, Daniela Carolina Mendoza Barboza, Margarita Grushevskaia dhe Laura Vanesa Mercado Baselga.

Mësohet se e reja nga Kolumbia kishte marrë katër shtëpi me qira në zona të ndryshme të Tiranës ku vendoste vajzat të cilave iu gjente klientë përmes reklamave në internet. Nën hetim janë vënë 4 persona që i kishin dhënë me qira banesat e tyre, shtetaseve të huaja.

Njoftimi i policisë

Finalizohet operacioni policor i koduar “Contact”, për goditjen e një rrjeti prostitucioni. Operacioni u zhvillua nga Seksioni për Hetimin e Trafiqeve të Paligjshme në DVP Tiranë, nën drejtimin e Prokurorisë pranë Gjykatës së Rrethit Gjyqësor Tiranë. Vihet në pranga 1 shtetase kolumbiane, organizatore e rrjetit të prostitucionit, në Tiranë. Vihen në pranga edhe 6 shtetase të huaja që kishin ardhur në Shqipëri, për të ushtruar prostitucion.

Procedohen penalisht 4 shtetas që i kishin dhënë me qira banesat e tyre, shtetaseve të huaja.

Specialistët e Seksionit për Hetimin e Trafiqeve të Paligjshme në DVP Tiranë, nën drejtimin e Prokurorisë pranë Gjykatës së Rrethit Gjyqësor Tiranë, në vijim të punës për goditjen e paligjshmërive, pas një pune të mirëfilltë hetimore, organizuan dhe finalizuan operacionin policor të koduar “Contact”.

Në kuadër të këtij operacioni u bë arrestimi i shtetaseve:

B. R., 30 vjeçe, shtetase kolumbiane, për veprën penale “Shfrytëzimi i prostitucionit”;

L. P., 28 vjeçe, L. B., 23 vjeçe, Y. S., 28 vjeçe, D. B., 31 vjeçe, M. G., 21 vjeçe dhe L. B., 22 vjeçe, nga Spanja, Kolumbia, Venezuela dhe Rusia, për veprën penale “Prostitucioni”.

Nga veprimet hetimore ka rezultuar se shtetasja B. R. shfrytëzonte për prostitucion shtetaset e tjera të arrestuara, të cilat kishin ardhur nga vende të ndryshme, në Shqipëri, ishin akomoduar në banesa me qira, në zona të ndryshme të Tiranës dhe nëpërmjet një faqeje në internet, krijonin kontakte me njerëz të ndryshëm, për të ushtruar prostitucionin, kundrejt pagesave.

Në vijim të veprimeve u proceduan penalisht 4 shtetas, të cilët kishin i dhënë me qira, pa deklaruar në organet tatimore, banesat e tyre, shtetaseve të arrestuara. Në cilësinë e provës materiale u sekuestruan pasaportat e 7 shtetaseve të arrestuara. Materialet i kaluan Prokurorisë, për veprime të mëtejshme procedurale.

/Gazeta Express