Një studim thotë se menopauza bën që të keni më shumë dhimbje nga reuma

Keshilla Mjekësore

Gazeta Express

25/11/2024 20:55

Kalimi nëpër menopauzë e bën artritin reumatoid më të dhimbshëm, sipas një studimi.

Një anketë kombëtare zbuloi se katër nga pesë gra raportuan përkeqësim të artritit gjatë menopauzës. Për një të dhjetën, simptomat u përkeqësuan ‘shumë’.

Studiuesit intervistuan 779 gra me artrit reumatoid që ishin në periudhën perimenopauzale, menopauzale ose postmenopauzale.

Studimi, i publikuar këtë muaj në revistën Musculoskeletal Care, gjithashtu zbuloi se terapia zëvendësuese hormonale (HRT) nuk ishte efektive në reduktimin e simptomave.

Gati gjysma e grave që plotësuan anketën ishin duke përdorur HRT, por vetëm një e treta thanë se ilaçi kishte ulur dhimbjen në një nivel të ‘moderuar ose domethënës’.

Artriti reumatoid, i cili prek më shumë se gjysmë milioni njerëz në Mbretërinë e Bashkuar, është një sëmundje kronike që shkakton ënjtje, dhimbje dhe ngurtësi në nyje, pasi sistemi imunitar sulmon gabimisht qelizat e shëndetshme të trupit.

Ndërsa ekzistojnë trajtime për simptomat, nuk ka një kurë përfundimtare, transmeton studimin GazetaExpress.

Pothuajse 93 për qind e grave raportuan se nuk kishin pasur diskutime mjekësore për menopauzën me një mjek, dhe shumica menduan se specialistët e artritit duhet të kenë trajnim më të mirë për mënyrën e trajtimit të tyre.

Ekspertët besojnë se rënia e niveleve të estrogjenit gjatë menopauzës është përgjegjëse për përkeqësimin e simptomave.

Në një përmbledhje të publikuar këtë vit në BMC Rheumatology, autorët deklaruan se nivelet e estrogjenit luajnë një rol ‘vendimtar’ në këtë gjendje.

Studime të tjera kanë treguar se gratë që përjetojnë menopauzë të hershme kanë pothuajse tre herë më shumë gjasa të zhvillojnë artrit reumatoid.

“Pacientët ndihen se anëtarët e ekipit reumatologjik duhet të kenë më shumë trajnim dhe të diskutojnë menopauzën më shpesh”, shkruajnë autorët e studimit.  /GazetaExpress/