OFK për Ligjin për çmimin e barnave: Rrezikon krijimin e monopoleve, shkakton mungesë barnash

Lajme

Gazeta Express

06/04/2025 10:32

Kryetari i Odës së Farmacistëve të Kosovës, Kadri Bytyqi, në një intervistë për Ekonomia Online, tha se vendimet e shpeshta dhe të paqëndrueshme të Ministrisë së Shëndetësisë për rregullimin e çmimeve të barnave po shkaktojnë paqartësi dhe probleme serioze në tregun farmaceutik,

Bytyqi ngriti shqetësime të forta se Ligji për çmimet e produkteve medicinale mund të çojë në krijimin e monopoleve dhe mungesë të barnave esenciale për qytetarët.

Ai gjithashtu kritikoi vendimmarrjen e Ministrisë së Shëndetësisë, duke e cilësuar atë të paqëndrueshme dhe të izoluar nga konsultimi me Odën e Farmacistëve.

“Ne si Odë kemi qenë dhe jemi për unifikimin e çmimeve, pra ligji duhet që të zbatohet në tërësinë e vet, por me vërejtjet që i kemi dhënë ne dhe që kanë dalë të jenë të vërteta të gjitha ato që i kemi potencuar. E them këtë, sepse e kemi kundërshtuar vendimin apo pikën numër 6 të vendimit të asaj kohe, pikë e cila i vinte në vështirësi të madhe farmacistët, por edhe të gjithë akterët, të cilët duheshin që ta implementonin atë. Ai vendim parashihte që barnatoret duhej të vendosnin çmimet në barna, pra ishte i kundërligjshëm si vendim, pika gjashtë, sepse dihet saktësisht se kush vendos apo shtyp apo jep banderola. Ajo është Agjencia e Kosovës për Pajisje të Produkteve dhe assesi barnatorja, apo në këtë rast farmacisti. Kohët e fundit ne e kemi parë që është ndryshuar një vendim, është vendosur një vendim tjetër i ministrit, pastaj prapë është anuluar. Vendimet e ministrit janë vendime që po i dalin të jenë vendime shumë afatshkurtra, tre-katërditore, që më nuk po mund të thirremi se në cilin vendim ka gabuar”, tha Bytyqi.

Një shqetësim tjetër i Odës së Faramcistëve, sipas Bytyqit, është është rreziku i krijimit të monopoleve, që mund të sjellë kontroll të tregut nga një numër i vogël kompanish.

“Për hir të opinionit duhet ta theksoj që ministria është tërësisht e mbyllur në raport me Odën, nuk e dimë me kë konsultohet. Çka kemi pasur ne parasysh, janë këto vendime, të cilat janë të pamatura, por që mund të jenë edhe me efekt kundërligjor dhe mund të dërgojnë drejt shtrimit të rrugës së forcimit të dy apo tri kompanive, gjegjësisht të krijimit të disa oligarkëve të rinj me apo pa vetëdijen e ministrit të Shëndetësisë”, tha ai.

Bytyqi tha se me zbatimin e Ligjit të ri në terren, efektet negative tashmë po ndihen, me mungesa të barnave esenciale.

“Kanë filluar disa mungesa në tregun tone. Kemi pasur ankesa nga kolegët tanë farmacistë anembanë Republikës. Ankesat e tyre janë shumë të bazuara, janë humanitare në radhë të parë sepse ata aty dalin për t’u shërbyer qytetarëve për nevojat e tyre. Pra, kemi pasur rastin e infuzioneve, ku qytetarët janë detyruar në raste edhe më ekstreme që të shkojnë të marrin për nevojat e sëmundjeve të familjarëve të tyre edhe në Kukës apo edhe në Shkup infuzione”, tha ai.

Përveç mungesave, Bytyqi theksoi se çmimet e disa barnave janë rritur, pavarësisht nga synimi i Ligjit për uljen e tyre.

“Kjo jo domosdoshmërisht ka ndodhur ashtu, sepse ka barna, të cilave edhe u është rritur çmimi. Nuk janë shumë, por ka. Mos të harrojmë që me rëndësi për MSh-në, për farmacistët, për qytetarët është furnizimi me barna. Sepse ne mund të vendosim edhe çmime tepër të ulëta e të mos ketë barna, atëherë i bie që nuk ke ulur asgjë, vetëm e ke rritur pamjaftueshmërinë në treg apo mosfurnizimin e qytetarëve me barna të nevojshme, të domosdoshme për shëndetin dhe jetën e tyre”, tha ai.

Bytyqi gjithashtu ngritur shqetësime për çmimet në krahasim me vendet fqinje.

“Me ligjin e ri, kolegët tanë, sepse ne kemi kolegë të cilët merren edhe me importim, kemi kolegë që njohin mirë pjesë të caktuara të fushës. Dy-tre nga ta më kanë thënë se ka barna të cilat janë shumë më të shtrenjta në listat e reja sesa që janë në Shqipëri ose Maqedoni, pra dy vendet që i kemi referenca edhe me ligj. Rrjedhimisht, kjo po del që nëse proklamimi ka qenë për ulje, gjithsesi me doemos apriori nuk paska ndodhur të jetë ashtu. Përveç nevojës së qytetarëve për të pasur qasje të lehtë në barna, i frikësohemi rrezikut të krijimit të monopoleve, e monopolet janë parakusht për krijimin e oligarkëve”, tha Bytyqi. /Ekonomia Online/