OSBE-ODIHR hap sot zyrtarisht misionin e monitorimit të zgjedhjeve te 11 majit

Shqiperi

Gazeta Express

02/04/2025 16:56

Zyra e OSBE për Institucione Demokratike dhe të Drejtat e Njeriut ka nisur misionin e saj të vëzhgimit për zgjedhjet parlamentare të 11 majit në Shqipëri. Ambasadori Lamberto Zannier, gjatë një konference për media në Tiranë, njoftoi se misioni do të përfshijë 300 vëzhgues, të cilët do të ndodhen në 12 qarqe të Shqipërisë, për të monitoruar zhvillimin e procesit zgjedhor.

Zannier tha se një grup vëzhgues afatshkurtër do të mbërrijë në Shqipëri para datës së zgjedhjeve, ndërsa ditën e zgjedhjeve do të jenë të pranishëm edhe vëzhgues nga Asambleja Parlamentare e OSBE, Asambleja Parlamentare e Këshillit të Evropës dhe Parlamenti Evropian. “Qëllimi ynë është të vlerësojmë nëse zgjedhjet janë në përputhje me angazhimet ndërkombëtare të Shqipërisë dhe legjislacionin e saj”, deklaroi Zannier.

Pjesë e vëzhgimit të OSBE-së do të jetë gjithashtu ndjekja e zbatimit të rekomandimeve të dhëna nga ODIHR për zgjedhjet e kaluara.

Ai gjithashtu u ndal tek bashkëpunimi me autoritetet shqiptare dhe theksoi se gjetjet do të ndahen përmes raporteve zyrtare. “Gjetjet tona do të bëhen publike nëpërmjet raporteve zyrtare, që do të ndihmojnë në përmirësimin e procesit zgjedhor në të ardhmen”, përfundoi Zannier.