Osmani pret në takime për fundvit Arben Vitinë dhe Arbërie Nagavcin, Presidenca tregon çka folën

Lajme

Gazeta Express

30/12/2023 9:40

Presidentja Vjosa Osmani ka zhvilluar takime gjatë kësaj jave me ministrat e Qeverisë Kurti. Osmani ka mbajtur takimin e fundvitit me Ministrin e Shëndetësisë, Arben Vitinë, si dhe Ministren e Arsimit, Shkencës dhe Teknologjisë, Arbërie Nagavci, raporton Express.

Për këto takime ka njoftuar Presidenca në faqen zyrtare.

Me Vitinë ka folur për sfidat dhe zhvillimet në sektorin e shëndetësisë.

“Në kuadër të Këshillit për demokraci dhe të drejtat e njeriut, të udhëhequr nga Presidentja, janë identifikuar një sërë çështjesh që e involvojnë sektorin e shëndetësisë, prandaj gjatë takimit u diskutua për reformat që janë realizuar si dhe planet konkrete për vitin në vijim me qëllim të parandalimit dhe luftimit të dhunës me bazë gjinore.

Në mes tjerash, Presidentja Osmani foli edhe për angazhimin e rregullt në drejtim të ndërtimit të partneriteteve, të reja të cilat kanë për qëllim mbështetjen e sektorëve të ndryshëm në vend, me ç’rast veçoi komunikimet e rregullta dhe bashkëpunimin e ngushtë me partnerë të shumtë ndërkombëtar me qëllim të mbështetjes dhe avancimit të shërbimeve të ofruara në fushën e shëndetësisë”, thuhet në njoftim.

Edhe me Nagavcin ka folur zhvillimet, sfidat më të shpeshta, si dhe planet për vitin e ardhshëm

“Me qëllim të përmirësimit të vazhdueshëm të sektorit të arsimit, por edhe sektorëve të tjerë, në takim u potencua rëndësia e veçantë që luan në këtë drejtim bashkëpunimi dhe koordinimi ndërinsititucional.

Në kuadër të Këshillit për demokraci dhe të drejtat e njeriut, të udhëhequr nga Presidentja, janë identifikuar një sërë çështjesh që e involvojnë sektorin e arsimit, prandaj gjatë takimit u diskutua për prioritetet tashmë të adresuara si dhe për planet konkrete për vitin në vijim me qëllim të parandalimit dhe luftimit të dhunës me bazë gjinore”, thuhet në njoftim.