Pakistani thotë se ka ‘inteligjencë të besueshme’ se India do të godasë brenda 36 orëve

Lajme

Gazeta Express

30/04/2025 11:45

Tensionet midis Indisë dhe Pakistanit janë përshkallëzuar edhe më tej pasi një zyrtar i lartë pakistanez pretendoi të mërkurën se kishte “inteligjencë të besueshme” se Nju Delhi do të kryejë një aksion ushtarak kundër Islamabadit brenda dy ditëve të ardhshme.

Pretendimi erdhi pasi si Shtetet e Bashkuara ashtu edhe Kina kërkuan përmbajtje.

“Pakistani ka inteligjencë të besueshme se India synon të kryejë aksione ushtarake kundër Pakistanit në 24-36 orët e ardhshme”, tha ministri pakistanez i Informacionit Attaullah Tarar në një postim të pazakontë gjatë mesnatës në X. Ai nuk shtjelloi se çfarë provash kishte Pakistani për të bërë këtë pretendim.

Komentet e Tararit vijnë vetëm një javë pasi militantët masakruan 26 turistë në qytetin malor të Pahalgam në Kashmirin e administruar nga India, një ngjarje që ka shkaktuar zemërim të madh.

India ka akuzuar Pakistanin se është përfshirë në sulm – një pretendim që Islamabadi e mohon. Pakistani ka ofruar një hetim neutral për incidentin.

CNN, që raportoi lajmin, tha se ka kontaktuar ministrinë e mbrojtjes të Indisë për t’iu përgjigjur pretendimeve të Tararit, transmeton Gazeta Express.

Kashmiri, një nga pikat e ndezjes më të rrezikshme në botë, kontrollohet pjesërisht nga India dhe Pakistani, por të dy vendet e pretendojnë atë në tërësi.

Dy rivalët me armë bërthamore kanë zhvilluar tri luftëra mbi territorin malor që tani është i ndarë nga një kufi de-fakto i quajtur Linja e Kontrollit që nga pavarësia e tyre nga Britania gati 80 vjet më parë.

Sulmi i javës së kaluar shkaktoi zemërim në Indi dhe kryeministri Narendra Modi është nën presion të jashtëzakonshëm për t’u hakmarrë me forcë.

India kreu sulme ajrore brenda Pakistanit në vitin 2019 pas një sulmi të madh kryengritës ndaj personelit paraushtarak brenda Kashmirit të administruar nga India. Ky ishte inkursioni i parë i tillë në territorin e Pakistanit që nga lufta e vitit 1971 mes dy fqinjëve.

Sulmi i fundit ndaj turistëve në Kashmir ka ngjallur frikën se India mund të përgjigjet në një mënyrë të ngjashme.