Palestra “Karagaçi” ende pa semafor, derbi Peja-Prishtina do të luhet në Gjakovë

Sport

Gazeta Express

27/02/2024 20:15

Kanë kaluar tri javë që prej kur klubet nga qyteti i Pejës nuk janë duke mundur që t’i zhvillojnë ndeshjet zyrtare në palestrën sportive “Karagaçi”, shkaku i mos-funksionimit të semaforit kryesor.

KB Peja ka bërë të ditur se derbin ndaj Sigal Prishtinës nuk do të mund ta zhvillojë në shtëpinë e saj, shkruan Gazeta Express.

Klubi pejan ka njoftuar se kjo ndeshje, që është në program për datën 29 shkurt, do të luhet në palestrën “Shani Nushi” në Gjakovë.

Derbi mes rivalëve të vjetër është i vlefshëm për Ligën Ballkanike.

“Ndeshja ndaj KB Prishtinës do të luhet në Palestrën ‘Shani Nushi’ në Gjakovë – për shkak të problemeve me semafor në Pejë. Ndeshja luhet të enjten, 29 Shkurt – me fillim në orën 19:00”, thuhet mes tjerash në njoftim të bërë nga faqja zyrtare e klubit nga Rrafshi i Dukagjinit.

Kujtojmë se problemi me semaforin në palestrën “Karagaçi” ishte shfaqur më 6 shkurt, në ndeshje që Peja e kishte luajtur ndaj AEL Limassol, në Ligën Ballkanike. Kjo ndeshje ishte zhvilluar vetëm pas improvizimit të një semafori.

Dy ditë pas kësaj ndeshje, kampioni në fuqi i Kosovës ishte detyruar që ndeshjen ndaj Bashkimit në Superligë, në të cilën ishte nikoqir, ta luante si mysafir në “Sezai Surroi” të Prizrenit. /Gazeta Express/