Sky Sport Italia raporton se Milani dhe Fabio Paratici kanë arritur një marrëveshje verbale, kështu që sapo të përfundojë e gjithë dokumentacioni, italiani do të bëhet drejtori i ri sportiv i Rossonerëve.
Ish-drejtori i futbollit te Juventusi, Paratici, pritet të emërohet si drejtori i ri sportiv i Milanit në javët e ardhshme, pasi palët arritën një marrëveshje verbale të mërkurën.
Paratici ishte takuar me CEO-n e Milanit, Giorgio Furlani, në Londër të martën. Sky Sport Italia raporton se ata kanë shtrënguar duart për marrëveshjen, kështu që 52-vjeçari do të marrë postin e ri duke nisur nga sezoni 2025-26.
Sipas Gianluca Di Marzios, palët do të përfundojnë dokumentacionin ligjor në javët e ardhshme, prandaj njoftimi zyrtar i klubit mund të vijë brenda disa muajve.
Paratici është ende duke vuajtur një ndalim 30-mujor, i cili përfundon zyrtarisht në korrik 2025.
Ai do të rikthehet në Serie A pas katër vitesh. Paratici u largua nga Juventusi në 2021 pas 11 vitesh në klub dhe nëntë titujve të fituar në Serie A.
Në garë për këtë pozitë ishte edhe ish futbollisti i Lazios dhe Shqipërisë, Igli Tare.
Ndër detyrat e tij kryesore te Milani do të jetë zgjedhja e një trajneri të ri për sezonin 2025-26. Raportimi më i fundit nga Gazzetta dello Sport të mërkurën sugjeron se Roberto De Zerbi i Marseille është kandidati kryesor për këtë pozitë. /GazetaExpress/
Edicioni
t7 live
