Parlamenti Europian: Shqipëria drejt përmbylljes së negociatave deri në 2027, përshëndesim reformat,

Shqiperi

Gazeta Express

05/04/2025 16:40

Parlamenti Europian ka miratuar raportin vjetor mbi implementimin e Politikës së Jashtme dhe Sigurisë, duke vlerësuar arritjet e Shqipërisë në rrugën drejt integrimit europian. Dokumenti, i hartuar nga eurodeputeti David McAllister, përgëzon përmbylljen me sukses të procesit të shqyrtimit (screening) dhe hapjen e kapitujve të parë të negociatave në vitin 2024.

Raporti thekson ambicien e Shqipërisë për të përmbyllur negociatat e anëtarësimit deri në vitin 2027, duke ftuar vendin të intensifikojë reformat në fushat kyçe, veçanërisht në drejtësi, luftën kundër korrupsionit dhe krimit të organizuar.

Një tjetër element kyç i dokumentit është mbështetja e qartë për institucionet e drejtësisë, në veçanti për SPAK-un, dhe paralajmërimi kundër çdo përpjekjeje për të cënuar pavarësinë e tyre.

“Theksohet rëndësia e një pluralizmi politik funksional dhe një opozite konkurruese. Kërkohet dialog konstruktiv mes mazhorancës dhe opozitës për të tejkaluar polarizimin politik dhe për të garantuar procese demokratike gjithëpërfshirëse,” theksohet më tej.