“Pasaporta europiane s’është për të ikur, por për dinjitet”, Rama në ‘Sy m’Sy’: Voto 5 për Shqipërinë në tryezën europiane

Shqiperi

Gazeta Express

05/04/2025 18:24

Kryeministri Edi Rama u është përgjigjur ndjekësve të tij në rrjetin social Facebook, përmes rubrikës së tij të zakonshme “Sy m’Sy”, ku sqaroi se pasaporta europiane nuk është një mjet për të ikur nga vendi, por një simbol i dinjitetit dhe të drejtave të barabarta për çdo qytetar shqiptar në Bashkimin Europian.

Në një reagim ndaj një ndjekësi që e ironizoi duke i thënë “mor piktor”, Rama theksoi se qëllimi i integrimit europian nuk është largimi nga Shqipëria, por barazia mes shqiptarëve dhe qytetarëve të tjerë të BE-së, qoftë për studentët, punëmarrësit apo udhëtarët.

“Pasaporta europiane nuk duhet për të ikur, se për të ikur ikën edhe me këtë që kemi, por duhet për të fituar dinjitetin e qytetarit të barabartë europian,” – u shpreh Kryeministri.

Ai solli në vëmendje edhe ndikimin pozitiv të anëtarësimit në BE për zhvillimin e mundësive për të rinjtë brenda vendit, për investime dhe për rritjen e standardeve të jetesës.

Rama ftoi qytetarin që i drejtoi pyetjen, dhe të gjithë shqiptarët, që t’i bashkohen këtij “projekti dhe kapërcimi historik”, duke votuar numrin 5 në zgjedhjet parlamentare të 11 majit – Partinë Socialiste.

“Të përçmosh punën e tjetrit është kollaj, por nuk të ndihmon të jetosh më mirë. Gjyshja ime thoshte: ‘mllefi, e zeza e të zotit!’ Shqipëria ka ndryshuar dhe do të ndryshojë edhe më shumë. Bashkohu me ne për Shqipërinë në BE,” – tha ndër të tjera Rama.