Përinski: Sistemi Sirera është themeli për efikasitet dhe transparencë në zbatimin e politikës për zhvillim të barabartë

Maqedoni

Gazeta Express

02/04/2025 17:51

Përfaqësues të ministrive, agjencive dhe institucioneve të tjera marrin pjesë në një punëtori dyditore të dedikuar për qëllimin, funksionet dhe rolin e sistemit elektronik Sirera për koordinimin e politikës për zhvillim të barabartë rajonal, në të cilin futen të dhëna nga institucionet e përfshira në zbatimin e saj.

Ministri i Vetëqeverisjes Lokale, Zllatko Perinski, sot në hapjen e punëtorisë dyditore, informoi se Ministria e Vetëqeverisjes Lokale po punon me përkushtim për të siguruar mbushjen në kohë dhe sistematike të sistemit, dhe tashmë 20 institucione shtetërore po fusin të dhëna në të, duke rritur transparencën dhe përmirësuar koordinimin e politikës për zhvillimin rajonal.

“Qëllimi ynë është të ndërtojmë një bazë funksionale të të dhënave, e cila do të mundësojë një analizë më të mirë dhe marrjen e vendimeve të informuara. Qëllimi përfundimtar i të gjithëve ne është zhvillimi i barabartë i të gjitha rajoneve në shtet, dhe kjo arrihet përmes krijimit të politikave të bazuara në të dhëna të sigurta, të cilat na i mundëson ky sistem”, theksoi ministri Perinski. Ai shtoi se është planifikuar që në vitin 2026, sistemi Sirera të lidhet me sistemin IFMIS, gjë që do të mundësojë tërheqjen automatike të të dhënave.

Ky sistem, i mbështetur nga Qeveria e Zvicrës, tashmë është përfshirë në procesin e shqyrtimit të Bashkimit Evropian për përparimin e shtetit tonë në Kapitullin 22. Me këtë, detyrimi për mbushjen e rregullt të bazës forcohet më tej dhe bëhet një segment i rëndësishëm në procesin e integrimit evropian të vendit tonë.