Pezullohen Wilderi dhe Fury pas luftës brutale

Boks

Gazeta Express

13/10/2021 15:10

Deontay Wilderi do të detyrohet ta shërbejë një pezullim mjekësor gjashtëmuajsh, pas rrahjes brutale që ia shkaktoi Tyson Fury të shtunën në Las Vegas.

Fury e mbrojti titullin e botës WBC në kategorinë e rëndë me një paraqitje mahnitëse, duke e nokautuar Wilderin në rundin e 11-të në një luftë të paparë, raporton Gazeta Express.

Edhe vetë boksieri britanik e puthi dyshemenë dy herë, që të dyja në rundin e katërt, në një luftë brutale që zgjati 11 runde.

Lufta e tretë Fury – Wilder do të mbahet në mend pa dyshim si njëra prej luftërave më të mira në historinë e boksit.

Wilderi u dërgua në spital për kontrolle mjekësore pas meçit, gjatë të cilit Fury e rrëzoi atë tri herë, përfshirë nokautin brutal.

Boksieri amerikan e theu njërin prej gishtërinjve gjatë luftës.

Komisioni Shtetëror i Atletikes në Nevada ka vendosur t’ia ndalojë boksin ish-kampionit të botës deri më 8 gusht. Wilderi do të ketë të drejtë të boksojë vetëm nëse ia lejon mjeku.

Ndërkohë, Fury është pezulluar me 45 ditë pas fitores, që është pezullim i rregullt për çdo boksier pas një lufte.

Kjo ishte fitorja e dytë e Furyt ndaj Wilderit që e vulos mbizotërimin e britanikut ndaj amerikanit.

31-vjeçari po ashtu vijon të jetë i pamposhtur si profesionit. /Gazeta Express/