Prokuroria nis hetimet për rastin në Veternik: Po bëhet shqyrtimi i plotë i rrethanave të kësaj ngjarje tragjike

Lajme

Gazeta Express

06/04/2025 11:31

Një person ka vdekur dhe një tjetër është lënduar si pasojë e rrëshqitjes së dheut dje në Veternik të Prishtinës. Lidhur me rastin është arrestuar një person, ka njoftuar sot Policia përmes raportit 24 orësh.

Ndërsa nga Prokuroria Themelore në Prishtinë kanë thënë se kanë nisur hetimet.

“Lidhur me pyetjen tuaj ju njoftojmë, se Prokurori i shtetit në koordinim me Policinë e Kosovës ka nisur hetim mbi vdekjen, bazuar në nenin 358 të Kodit Penal të Republikës së Kosovës, dhe me kujdes të shtuar po shqyrtojnë aspektet e rastit për shqyrtimin e plotë të rrethanave të kësaj ngjarje tragjike”, kanë thënë nga Prokuroria për Express.

Punëtori që vdiq është Fatlum Haradini, 40 vjeç.

Lajmi është konfirmuar nga familjarët, të cilët kanë shprehur dhimbjen e thellë për humbjen e më të dashurit të tyre.

“Me pikëllim të madh, ju njoftojmë se sot, pas një aksidenti në punë, ka ndërruar jetë më i dashuri ynë, Fatlum Xh. Haradini,” thuhet në njoftimin e familjes.

Detajet lidhur me ditën dhe orën e varrimit do të bëhen të ditura në vijim. /GazetaExpress/