Prokuroria thotë se e ka trajtuar me seriozitet të lartë mundësinë e rihapjes së grupit “Albkings”: S’ka grup tjetër të ngjashëm

Lajme

Gazeta Express

02/04/2025 12:06

Prokuroria Themelore në Prishtinë ka thënë se rasti i njohur në publik si “Albkings” është trajtuar me prioritetin dhe seriozitetin më të madh nga ana e Prokurorisë.

Reagimi i Prokurorisë vjen pas disa raportimeve në media se është rihapur një grup tjetër i ngjashëm me “Albkings”.

Por, këtë e ka mohuar Prokurori i Shtetit.

“Prokurori i Shtetit në bashkëpunim me Policinë e Kosovës gjatë gjithë fazës së hetimit, por edhe pas ngritjes së aktit akuzues ka përcjellë me kujdes dhe trajtuar me vëmendje çdo informacion mbi mundësinë e rihapjes së këtij grupi apo grupeve tjera me përmbajtje të ngjashme, informacione këto të cilat pas verifikimit kanë rezultuar të pavërteta”.

Andaj, Prokuroria Themelore në Prishtinë “iu bën apel të gjitha mjeteve informuese të kenë parasysh me rastin e plasimit të lajmeve të mos publikojnë informata të pasakta, me qëllim të dezinformimit të publikut”./Express/