Pushimet përfundojnë në tragjedi/ Më të fundit nga mbytjet e sotme në Velipojë dhe Spille

Ballina

Gazeta Express

22/08/2021 12:31

Pushimet në këto javë të fundit të muajit gusht kanë përfunduar në tragjedi për tre persona.

Dy burra nga Maqedonia e Veriut M. M., 79 vjeç dhe C. M., 78 vjeç janë mbytur këtë ditë të diele në plazhin e Spillesë.

Me gjithë përpjekjet e stafit të mjekëve që shkuan në kohë rekord, ata nuk arritën dot të mbijetonin.

“Rreth orës 11:25, në plazhin e Spillesë, dy shtetas të gjinisë mashkullore ende të paidentifikuar,(dyshohet se janë shtetas Maqedonas),  rreth 70 vjeç, dyshohet se si pasojë e dallgëve janë mbytur në det. Grupi hetimor ndodhet në vendngjarje dhe po punon për identifikimin e tyre dhe sqarimin e rrethanave të ngjarjes. 

Në vijim të informacionit paraprak të dhënë pak më parë, ju bëjmë me dije se: Shtetasit që humbën jetën si pasojë e mbytjes në det janë M. M., 79 vjeç dhe C. M., 78 vjeç, pushues nga Maqedonia e Veriut. Vijon puna nga Grupi hetimor për sqarimin e rrethanave të ngjarjes”, shkruan policia.

Shkak mendohet të jenë dallgët, ndërsa dyshohet se ata kishin konsumuar alkool para se të futeshin në det.

Top Channel ka siguruar pamje nga vendi i ngjarjes, ndërsa personave u jepet ndihma e shpejtë.

Gjithashtu i mbytur ditën e sotme është një 59-vjeçar i identifikuar si Hasan Hysenaj, i cili po lahej në plazhin e Velipojës. Sipas informacioneve të deritanishme Hysenaj është shtetas i Kosovës.

“Rreth orës 11:15, në plazhin e Velipojës, shtetasi H. H.  rreth 59 vjeç, dyshohet se  është mbytur në det. Grupi hetimor ndodhet në vendngjarje dhe po punon për sqarimin e rrethanave të ngjarjes”, sipas policisë.

Burimi : Top Channel