Rama me emigrantët në Athinë: Shqipëria ka përparuar, BE po na mbështet; Fond 300 milionë euro për ata që kthehen në atdhe

Shqiperi

Gazeta Express

31/03/2025 13:33

Kryeministri Edi Rama ka zhvilluar një takim me emigrantët shqiptarë në Athinë, ku ka diskutuar për progresin e Shqipërisë në administratë, mundësitë e zhvillimit dhe mbështetjen për ata që zgjedhin të kthehen në vend. Gjatë këtij takimi, Rama ka theksuar rëndësinë e përdorimit të platformave online për shërbimet administrative dhe ka ofruar mundësi të reja për emigrantët që duan të investojnë në Shqipëri.

“Nëse administrata do të ishte zero, Shqipëria nuk do të kishte mundësinë të hapte negociatat për anëtarësim në BE“, ka deklaruar ai.

Në lidhje me emigrantët që po konsiderojnë të kthehen, Rama ka njoftuar një fond të ri prej 300 milionë eurosh që do të mbështesë ata që duan të investojnë në Shqipëri, veçanërisht përmes kredive të buta dhe mundësive për strehim. “Ne jemi duke krijuar mundësi të reja për t’iu mundësuar atyre që kthehen të ndihmojnë zhvillimin e vendit. Shqipëria është një vend që po rrit mundësitë për të rinjtë dhe për ata që duan të investojnë në të ardhmen” ka thënë Rama

Rama ka theksuar gjithashtu rëndësinë e mbështetjes për procesin e integrimit të Shqipërisë në Bashkimin Europian dhe ka inkurajuar emigrantët të angazhohen më shumë në procesin politik të vendit. “Vota juaj është shumë e rëndësishme për Shqipërinë. Zgjedhjet e 11 majit janë një mundësi për të ndihmuar në hapjen e pasaportave shqiptare të BE-së dhe për të krijuar mundësi të reja për shqiptarët që jetojnë jashtë dhe për ata që duan të kontribuojnë në zhvillimin e vendit“, ka përfunduar ai.