Rama: Ushtria shqiptare, më e mirëpaguar në rajon, investime rekord dhe sfida të reja në mbrojtje

Shqiperi

Gazeta Express

05/04/2025 16:17

Kryeministri Edi Rama dhe ministri i Mbrojtjes, Pirro Vengu, morën pjesë sot në një aktivitet të zhvilluar në Zall Herr, ku u prezantuan arritjet, sfidat dhe prioritetet e ardhshme në fushën e mbrojtjes dhe sigurisë.

Në fjalën e tij, kryeministri Rama theksoi transformimin rrënjësor që ka pësuar ushtria shqiptare gjatë viteve të fundit. Ai vuri në dukje se Forcat e Armatosura kanë kaluar nga një periudhë e vështirë braktisjeje institucionale, në një fazë të re me investime të larta dhe standarde të NATO-s.

“Nga ushtria më e keqpaguar, sot kemi ushtrinë më të mirëpaguar në rajon. Rrogat janë rritur deri në 1550 euro, dhe rekrutimet janë pesëfishuar. Kemi bërë atë që kemi premtuar,” tha Rama.

Kreu i qeverisë përmendi gjithashtu programin e kredive të buta për efektivët dhe familjet e tyre, me 179 përfitues deri tani, si dhe rritjen e ndjeshme të përfshirjes së grave në ushtri, që ka shkuar nga 10% në mbi 20%.

Në vijim të fjalës së tij, Rama bëri edhe një batutë drejtuar efektivëve beqarë:

“Beqarët janë për frontin, por kur të martoheni, mirësevini në programin e kredive për shtëpi.”

Ministri i Mbrojtjes, Pirro Vengu, theksoi progresin e bërë në 16 vitet e anëtarësimit të Shqipërisë në NATO, duke nënvizuar një rritje trefishe të angazhimit në strukturat e aleancës dhe pjesëmarrjen e 500 ushtarakëve shqiptarë në misione ndërkombëtare.

“Për herë të parë, mbrojtja dhe siguria nuk kanë më problematika financiare. Vëmendja e qeverisë është e përditshme ndaj Forcave të Armatosura,” tha Vengu.