Ronaldo Fenomeni zgjedh ish-bashkëlojtarin që nuk i pëlqente të luante fare me të

Sport

Gazeta Express

01/04/2025 17:29

Ronaldo Nazario dikur përmendi një ish-shok skuadre me të cilin “nuk i pëlqente të luante” gjatë karrierës së tij. 

I njohur si R9, Ronaldo pati një karrierë të jashtëzakonshme duke luajtur për klube si Cruzeiro, PSV Eindhoven, Barcelona, Inter Milan, Real Madrid, AC Milan dhe Corinthians.

Ai fitoi dy herë Topin e Artë, në vitet 1997 dhe 2002, shkruan Gazeta Express.   

Megjithatë, dëmtimet ndikuan që forma e brazilianit të binte më shpejt sesa pritej. Sulmuesi e përfundoi karrierën me një total prej 352 golash në 518 ndeshje. 

Gjatë karrierës së tij, Ronaldo luajti me disa nga lojtarët më të mirë në botë, duke përfshirë yje si Ronaldinho, Zinedine Zidane, Roberto Carlos, David Beckham dhe Luis Figo. 

Megjithatë, së fundmi, në një intervistë për “Romario TV”, Ronaldo përmendi një ish-shok skuadre që nuk e pëlqente si partner në fushë, duke e quajtur ish-mesfushorin brazilian Amaral lojtarin “më pak teknik” me të cilin ka ndarë fushën. 

Ai u shpreh me humor: “Vraponte shumë, por rikuperonte 10 topa dhe humbiste nëntë prej tyre”. 

Ish-mesfushori Amaral arriti të luante 10 ndeshje për kombëtaren braziliane gjatë një karriere që zgjati mbi 23 vite. 52-vjeçari ka luajtur për klube si Palmeiras, Parma, Benfica, Fiorentina dhe Gremio, përpara se të tërhiqej nga futbolli në vitin 2015.  

Përveç Amaral, Ronaldo përmendi edhe danezin Thomas Gravesen si një nga lojtarët më të dobët me të cilët ka luajtur. 

Ai tha: “Thomas Gravesen ishte një njeri fantastik, shumë i mirë si person. Jo shumë kohë më parë, ai fitoi një turne pokeri prej 50 milionë dollarësh apo diçka e tillë. Por në futboll, ishte shumë i dobët, ndërhynte ashpër dhe godiste fort.” 

Nga ana tjetër, kur u pyet për lojtarët më të mirë me të cilët ka luajtur, Ronaldo zgjodhi Ronaldinhon dhe Zidanen. 

Braziliani shtoi: “Më të mirët ishin Ronaldinho Gaúcho, me kombëtaren, dhe Zidane, në nivel klubesh. ‘Zizou’ kishte shumë klas, ishte ndryshe, shumë teknik, e bënte gjithçka të dukej e lehtë”, përfundoi ai./GazetaExpress/