Rrëfimi ekskluziv i Taulant Hodajt në “Favorit”: Nga Rumania deri te përfshirja e Milan Radoiçiq në futbollin kosovar

Sport

Gazeta Express

06/04/2025 23:00

Ish-sekretari i përgjithshëm i Federatës së Futbollit të Kosovës, Taulant Hodaj ka qenë i ftuar në emisionin “Favorit” që transmetohet në T7, përmes një lidhje direkte.

Ai ka rrëfyer ekskluzivisht në “Favorit” për veprimet e Milan Radoijqiqit e deri te sjelljet e kryetarit Agim Ademi pas rastit në Rumani.

“Unë kam tentuar që problemet e FFK-së t’i rregulloj përbrenda, jam munduar me mish e me shpirt, mirëpo sa herë i kam adresuar, kam hasur në vesh të shurdhër. Kulmi ishte në Rumani, kur kryetari Agim Ademi e disa anëtarë të FFK-së u futën në zhveshtore e kërcënuan lojtarët. Aty e kam parë që nuk mund të jem në atë vend”, ka thënë ai fillimisht në “Favorit”.

“Më pas, kur shkuam në CAS për rastin në Rumani, kryetari Ademi nuk i lejoi lojtarët e as anëtarët e tjerë të FFK-së të dëshmojnë,  edhe pse kemi pas mundësi të mira për të fituar”, shtoi Hodaj.

Tutje, ai konfirmoi se krimineli, Milan Radoijqiq ka qenë i përfshirë me një strukturë ilegale të Serbisë në Kosovë.

“Milan Radoijqiq ka qenë kryetar i Federatës së Futbollit për të Ashtuquajtërën Kosovë dhe Metohijë, kjo ka qenë publike, madje kanë pasur edhe faqe të Facebookut”, tha ai.

Hodaj nuk i kurseu kritikat për FFK-në, për të cilën tha se nuk ka fare profesionalizëm.

“Kur i kam parë skandalet e njëpasnjëshme, ka qenë momenti i reflektimit për mua. Aty nuk ka profesionalizëm, unë kam dashur t’u ndihmoj, mirëpo nuk kanë dashur ndihmën. Prej mosdijës, aty krijohen e plasin skandale”, shtoi Hodaj.