Rutte për marrëveshjet që i bënë Kosova, Shqipëria e Kroacia dhe Serbia me Hungarinë në anën tjetër: NATO s’ka të bëjë me to

Lajme

Gazeta Express

02/04/2025 20:22

Sekretari i përgjithshëm i NATO-s, Mark Rutte, sot në Bruksel, nuk ka dashur të komentojë marrëveshjen për mbrojtje Kosovë-Shqipëri-Kroaci, si dhe atë midis Serbisë dhe Hungarisë.

Ai në një konferencë për media tha se këto marrëveshje janë jashtë NATO’s, pra nuk kanë të bëjnë me aleancën.

“Përveç kësaj marrëveshjeje ka edhe disa të tilla, tripalëshe apo dypalëshe. Kemi psh, atë mes Shqipërisë, me Kosovën dhe Kroacinë. Dua të them këto  marrëveshje janë jashtë NATO’s. NATO nuk është pjesë e tyre. Pra ato nuk kanë të bëjnë me aleancën”, tha ai.

Theksojmë se në muajt e fundit, vendet e Ballkanit Perëndimor kanë intensifikuar bashkëpunimin në fushën e sigurisë dhe mbrojtjes përmes marrëveshjeve dypalëshe dhe rajonale.

Kosova, Shqipëria dhe Kroacia kanë nënshkruar një marrëveshje bashkëpunimi në mbrojtje, e cila synon rritjen e sigurisë rajonale dhe forcimin e kapaciteteve ushtarake përballë sfidave të përbashkëta.

Në anën tjetër, Serbia dhe Hungaria kanë forcuar bashkëpunimin e tyre, duke nënshkruar marrëveshje strategjike në fushën e mbrojtjes.