Saga e transferimit të Gyokeres bën hapin e madh, sulmuesi gjithnjë e më afër Arsenalit

Futboll

Gazeta Express

07/04/2025 11:19

Sulmuesi i Sporting CP dhe i përfaqësueses së Suedisë, Viktor Gyokeres, është lidhur ngushtë me një transferim në Premier League këtë verë.

Lëvizja e mundshme e Gyokeres gjatë afatit kalimtar të verës ka marrë një kthesë të madhe.

26-vjeçari është një nga sulmuesit më të kërkuar në Evropë, pasi ka shënuar 43 gola dhe ka dhënë 11 asistime në 43 paraqitje për Sporting CP këtë sezon.

Ky rekord mbresëlënës ka tërhequr interesin e klubeve të Premier League, si Arsenal dhe Manchester United. Sulmuesi suedez ka punuar më parë me trajnerin e United, Ruben Amorim, tek kampionët portugezë.

Megjithatë, sipas Daily Mail, lojtari preferon një kalim te Arsenali në vend të Manchester United, pasi skuadra e Mikel Artetës ka më shumë gjasa të luajë në Champions League sezonin e ardhshëm. United ende mund të sigurojë kualifikimin nëse fiton Europa League.

Një sinjal pozitiv për Arsenalin

Para ndeshjes së parë çerekfinale të Champions League kundër Real Madrid, Arsenali ka marrë një lajm të rëndësishëm.

Sipas Football Transfers, agjenti i Gyokeres do të jetë i pranishëm në Emirates të martën në mbrëmje, duke e afruar atë me drejtorin e ri sportiv të Arsenalit, Andrea Berta.

Vetëm javën e kaluar, The Athletic raportoi se Gyokeres është prej kohësh në radar të Bertës dhe pritet të jetë një nga objektivat e Arsenalit këtë verë.

Gjithsesi, thuhet se Arteta është një adhurues i madh i sulmuesit të Newcastle, Alexander Isak, megjithatë Newcastle nuk ka ndërmend ta shesë atë këtë verë.

Gyokeres mund të jetë opsioni më i lirë, pasi Sporting është i gatshëm ta lërë të largohet për një shifër mes 55-70 milionë paund, ndërsa Isak mund të kushtojë mes 100-150 milionë paund.

Arteta premton një merkato të madhe verore

Arsenali aktualisht është në vendin e dytë në Premier League dhe sezoni i tyre është ndikuar nga lëndimet e lojtarëve kyç, si Bukayo Saka, Kai Havertz dhe Gabriel Jesus.

Në një konferencë për shtyp të martën, Arteta premtoi një merkato të madhe verore.

 “Pesë afatet tona të para të merkatos ishin planifikuar të ishin shumë të mëdha dhe me objektiva të ndryshme, pasi duhej një riformatim i skuadrës. Tani, kur do të hyjmë në një tjetër fazë, duam të rrisim jo vetëm thellësinë e ekipit, por edhe cilësinë dhe aftësitë që na duhen për të kaluar në nivelin tjetër. Do të jetë një merkato e madhe dhe jemi shumë të entuziazmuar për të”, tha ai. /GazetaExpress/