Selektori i Sllovakisë: Anglia u frikësua, ne e merituam të kalonim tutje

Futboll

Gazeta Express

01/07/2024 9:42

Trajneri italian Francesco Calzona akuzoi Anglinë për ‘humbje kohe’ gjatë fitores së tyre në kohën shtesë ndaj Sllovakisë në EURO 2024.

Trajneri pati një grindje me mesfushorin Declan Rice pas fishkëllimës përfundimtare, kur ai po përpiqej të ankohej tek arbitri Umut Meler, duke shtyrë lojtarin anglez larg.

“Djemtë punuan aq shumë dhe ndoqën atë që i kërkova deri në detaje,” tha Calzona për Sky Sport Italia.

“Ne u dhamë atyre pak më shumë në pjesën e dytë, por kjo ishte e pritshme kundër një skuadre të këtij niveli. Në kohën shtesë, ishte një trafik një kahësh, ne i mbajtëm ata prapa dhe ata u mbështetën në humbjen e kohës dhe pengesën.

“Isha i zemëruar sepse një minutë shtesë e ndalimeve me sasinë e humbjes së kohës, veçanërisht nga portieri i tyre, nuk ishte e mjaftueshme.”

Sllovakia kishte qenë vetëm disa sekonda larg arritjes në çerekfinale, pasi ata ishin duke kryesuar me golin e Ivan Schranz kur Jude Bellingham barazoi me një goditje spektakolare në minutën e 95-të.

Harry Kane më pas shënoi me kokë në fillim të vazhdimeve dhe Anglia u mbrojtën për pjesën tjetër të gjysmë orës, gjë që e frustronte shumë Calzonan.

“Nuk më pëlqeu fare performanca e arbitrit, por sigurisht që nuk humbëm për shkak të kësaj. Humbëm për shkak të disa shpërqendrimeve, por padyshim që jam shumë krenar për skuadrën time pasi luajtëm futboll pozitiv, bëmë një performancë të shkëlqyer dhe mendoj se populli i Sllovakisë do të jetë krenar për këtë.”

Megjithëse ishin skuadra më e dobët, Sllovakia kishte më shumë goditje në portë gjatë gjithë ndeshjes dhe mbajtën iniciativën për periudha të gjata.

Ai barazim nga Bellingham ishte gjuajtja e parë në portë e Anglisë në ndeshje.

“Ne e dinim që nuk mund të lëmë hapësirë midis linjave, të gjithë e dimë çfarë mund të bëjë Bellingham dhe duhej ta mbanim të ngushtë. Kemi pasur shanse në pjesën e parë për ta mbyllur ndeshjen dhe do të kishte ndryshuar gjithçka.”

Pavarësisht rezultatit, Calzona dhe mënyra se si ai e vendosi Sllovakinë në këtë ndeshje impresionoi çdo neutral që po shikonte.

“Është një burim krenarie të detyrosh një skuadër si Anglia të fokusohet vetëm në mbrojtje në kohën shtesë. Kjo do të thotë që ata ishin të frikësuar nga ne dhe sipas mendimit tim ne meritonim të kalonim më tej.”