Serbët nuk i ndahen Betejës së Kosovës – policia vazhdon ta zhvesh mitin në Gazimestan

Lajme

Gazeta Express

28/06/2022 16:10

Festa nacionalisto-fetare e Vidovdanit solli sot në Kosovë, vartësin e Vuçiqit në qeveri, Petar Petkoviqin dhe kreun e Kishës Ortodokse Serbe, Porfirije. Shteti dhe Kisha e Serbisë kujdesen që serbët në Kosovë të ushqehen me idenë se “Kosova është origjina e serbëve dhe tokë e shenjtë e tyre”. Dy emisarët, mesazhet e tyre i shpalosën në Manastirin e Graçanicës ku pati liturgji. Të rinjëve nga Serbia, që quhen “pelegrinë”, e që bartnin  mesazhe nacionaliste në fanella, policia e Kosovës sipas praktikave të viteve të kaluara, ua zhveshte ato.

Gazeta Express

Rëndom, serbët nga Serbia dhe nga shtetet tjera ku jetojnë, organizohen dhe marrin rrugë drejt Graçanicës për të marrë pjesë në liturgjinë që shënon Vidovdanin e më pastaj vazhdojnë rrugën drejt monumentit të “heronjëve të Betejes së Kosovës” në Gazimestan, që gjendet afër fshatit Mazgit, tetë kilometra nga Prishtina. Kështu serbët vazhdojnë ta mbajnë të gjallë mitin e tyre 633 vjet të vjetër.

Para se të futen në Gazimestan, serbët që kanë veshje me mesazhe nacionaliste serbe detyrohen nga policia e Kosovës që t’i heqin ato pasi cilësohen si provokim.

Petar Petkoviq, ishte i dërguari i Vuçiqit në Kosovë për Vidovdan u kujdes të bëjë deklarata provokuese.

Ai nga Graçanica sot tha se “s’është hera e parë që Prishtina provoi t’i provokojë serbët në Kosovë për festa”.

Petkoviq që i ka halë në sy autoritetet e Kosovës që janë përgjegjëse për vendosjen e rendit dhe ligjit tha se ministrat e qeverisë së Serbisë u ndaluan që të futen në Kosovë për të shënuar Vidovdanin.

“Përveç faktit se vizita e ministrave tanë që dëshironin të festonin Vidovdanin me njerëzit në Kosovë u ndaluan sot, ne patën një ndërhyrje të njësisë speciale të Policisë së Kosovës në Gorazhedec dhe arrestimin e Milorad Gjokoviq. Provokimet sikur herave të kaluara erdhën nga Prishtina”, tha Petkoviq.

Kurse udhëheqësi fetar në Serbi, Patriarku Porfirije gjatë liturgjisë në Graçanicë tha se “Kosova është vendlindja e popullit serb”.

“Sot jemi mbledhur në Graçanicën e shenjtë. Kur jemi në këtë vend pa marrë parasysh se sa larg tij jemi, kur vijmë këtu ne kthehemi te vetvetja jonë, sepse ky vend në Kosovë është vendi i lindjes sonë, ne e kemi origjinën këtu”, tha ai nga manastiri i Graçanicës.

Kisha Ortodokse Serbe e cilëson festën e Vidovdanit si ditë përkujtimore për heronjtë e Serbisë që ranë gjatë Betejes së Kosovës më 1389.

Pelegrinazhi i serbëve për këtë festë mbahet te monumenti në Gazimestan.