Shkeljen flagrante të ligjit Kurti mundohet ta kalojë duke u lazdruar: Mua më dënojnë nganjëherë, por mos u mërzitni ju

Lajme

Gazeta Express

02/04/2025 16:46

“Më dënojnë mua nganjëherë, por mos u mërzitni ju”.

Kështu u përgjigj sot kryeministri në detyrë, Albin Kurti, kur është pyetur lidhur me dënimin që gjykata i ka shqiptuar për mosparaqitje në Prokurorinë Speciale lidhur me rastin e rezervave shtetërore. Gjykata në Prishtinë për këtë dënoi Kurtin me 250 euro.

Kurti u përball me disa pyetje të gazetarëve në Gjakovë ku shkoi atje për përurimin e çerdhes “Ganimete Tërbeshi”, në fshatin Rezinë.

Për formimin e Qeverisë, Kurti foli për takimet e nisura me komunitetet joshumicë, duke lënë të kuptohet se do të ketë edhe takime tjera, por pa specifikuar se me cilat parti.

“Kemi filluar me takime zyrtare me krerë të partive politike, paradite kanë qenë Emilja Rexhepi dhe Nenad Rashiq, do të vazhdojmë edhe me të tjerët”, tha Kurti.

Seanca konstituive e Kuvendit të Kosovës është caktuar më 15 prill. Menjëherë pas formimit të Kuvendit, partia e Kurtit si fituese e zgjedhjeve është mandatare për formimin e Qeverisë. /Express/