Sindikata e PK-së dënon atentatin ndaj rreshterit Muhamed Likaj: Çdo sulm ndaj një zyrtari policor, është sulm ndaj Republikës së Kosovës!

Lajme

Gazeta Express

02/04/2025 9:52

Sindikata e Policisë së Kosovës ka reaguar ashpër për vrasjen e pjesëtarit të Policisë së Kosovës që ndodhi mbrëmë në Kaçanik.

Sipas këtij reagimi, Sindikata dënon atentatin kriminal që i mori jetën Rreshterit Muhamed Likajt.

“Ky akt i rëndë është një atentat i drejtpërdrejtë ndaj sigurisë publike, ligjit dhe vetë shtetit të Kosovës”.

Çdo sulm ndaj një zyrtari policor, sipas sindikatës është sulm ndaj Republikës së Kosovës!

“Policia e Kosovës është shtylla kryesore e rendit dhe sigurisë në vend. Prekja e saj është përpjekje për të minuar themelet e shtetit tonë dhe nuk do të tolerohet. Sindikata e Policisë së Kosovës kërkon nga të gjithë akterët shtetërorë dhe institucionet e drejtësisë veprime të menjëhershme për zbardhjen e këtij akti kriminal dhe vënien para përgjegjësisë të autorëve”.

“Ne qëndrojmë të palëkundur në mbështetje të çdo pjesëtari të Policisë së Kosovës dhe nuk do të lejojmë që këto akte të frikësimit të lëkundin përkushtimin tonë ndaj detyrës dhe Republikës. Nder dhe lavdi për sakrificën e Rreshter Muhamed Lika!”, thuhet në reagimin e Sindikatës së Policisë së Kosovës.