Super Barcelona, vazhdon e vetme kryesimin në La Liga

Futboll

Gazeta Express

30/03/2025 18:14

Barcelona ka siguruar një fitore bindëse 4-1 ndaj Gironës në ndeshjen e vlefshme për javën e 29-të të La Ligës, duke ruajtur kryesimin e kampionatit spanjoll.

Sfida nisi me dominim të katalanasve, të cilët kaluan në avantazh pak para fundit të pjesës së parë, falë një autogoli të Krejcit në minutën e 43-të.

Në pjesën e dytë, Girona reagoi dhe barazoi rezultatin me anë të Arnaut Danjumës në minutën e 53-të, shkruan Gazeta Express.

Megjithatë, Barcelona nuk u dorëzua dhe Robert Lewandowski riktheu epërsinë për vendasit në minutën e 61-të.

Sulmuesi polak ishte protagonist sërish, duke realizuar golin e tretë për ekipin e tij në minutën e 77-të, duke vulosur fitoren me dy gola të tij.

Në minutën e 86-të, Ferran Torres shënoi golin e katërt për Barcelonën, duke mbyllur ndeshjen me një triumf të qartë për blaugranat.

Pas kësaj fitoreje, Barcelona ngjitet në kuotën e 66 pikëve, duke ruajtur kreun e La Ligës me tre pikë më shumë se Real Madridi, që ndjek me 63 pikë. Ndërkohë, Girona mbetet në vendin e 13-të me 34 pikë.

Ky sukses forcon pozitat e Barcelonës në luftën për titull, ndërsa Lewandowski vazhdon të konfirmohet si golashënuesi më i mirë i sezonit.