Tragjedia në spitalin modular / Familjarët: para drejtësisë të dalin fajtorët e vërtetë

Maqedoni

Gazeta Express

03/04/2025 16:03

Në Gjykatën Themelore të Tetovës vazhdoi seanca gjyqësor për zjarrin në Spitalin Modular në Tetovë më 8 shtator të vitit 2021, ku humbën jetën 14 pacientë dhe familjarë të tyre. Para se të fillonte vazhdimi i rigjykimit, familjarët e viktimave kërkuan të rihapet hetimi për të gjetur fajtorët e vërtetë të zjarrit, të formohet një ekip i pavarur që do të shqyrtojë të gjitha aspektet e rastit, të garantohet se procedura gjyqësore do të zhvillohet pa ndikime partiake apo biznesore.

“Është koha që dikush të merr përgjegjësi që drejtësia të del nga sirtari. Si familjarë të viktimave kërkojmë nga ju të rihapet hetimi për të gjithë fajtorët e vërtet të zjarrit në spitalin modular në Tetovë, të formoni një ekip të pavarur që do të shqyrtoj të gjitha aspektet e rastit përfshirë edhe zvarritjen eventuale të procedurës nga prokurorët, të garantoni se procedura gjyqësore do të zhvillohet pa ndikim partiak apo të biznesit, të siguroni transparencë dhe përgjegjësi në punën tuaj në përputhje me obligimet ligjore. Ekspertiza gjermane le të jetë si provë kyçe në këtë hetim. Ne nuk do të heshtim, do të vazhdojmë ta flasim për të dashurit tanë që I humbëm, për drejtësi që na është premtuar por asnjëherë nuk është realizuar”, deklaroi Mumin Ismaili, familjar.

Seanca vazhdoi me marrjen në pyetje të ekspertëve, përkatësisht Irfan Shaqirit, elektroinxhiner, dhe Rubin Boshkovskit, ekspert i MPB-së në sektorin e forenzikës. Shaqiri foli për instalimin e rrymës elektrike duke theksuar se instalimi është bërë nga dy të punësuar në Spitalin Klinik të Tetovës, ku sipas tij, kyçja e rrymës elektrike nga trafoja kryesore e deri në modular është bërë pa asnjë standard.

Si pasojë e vendosjes së më shumë aparateve në kabllon vazhdues ka ardhur deri tek zjarri. Boshkovski, tha se sipas analizave objekti i modularit është ndërtuar me materiale lehtë të ndezshme. Në seancë sërish u parashtruan pyetje lidhur me mungesën e aparateve për shuarjen e zjarrit. Në bankën e të akuzuarve janë ish drejtori spitalit të Tetovës, Florin Besimi dhe drejtori organizativ Artan Etemi.