Trajneri i Sociedadit ankohet në referim: Real Madridi nuk ka nevojë për ndihmë të tillë

Futboll

Gazeta Express

02/04/2025 8:37

Real Madrid është skuadra e parë që siguron një vend në finalen e Kupës.

Pas fitores 0-1 në ndeshjen e parë kundër Real Sociedad në Donosti, “Los Blancos” arritën një përmbysje spektakolare në “Santiago Bernabéu”.

Pavarësisht se baskët kryesonin 1-3, ekipi i Ancelottit barazoi rezultatin në 4-4 duke çuar ndeshjen në kohën shtesë. Tashmë, madrilenët presin të mësojnë kundërshtarin e tyre në finale, që do të jetë njëri mes FC Barcelona dhe Atlético Madrid, të cilët përballen sonte në “Metropolitano” nga ora 21:30.

Pas përfundimit të sfidës, trajneri i Real Sociedad, Imanol Alguacil, foli në konferencën për shtyp, ku lavdëroi paraqitjen e ekipit të tij, por njëkohësisht kritikoi edhe gjykimin e Alberola Rojas.

“Ka një pozicion të mundshëm jashtë loje, që duhej të akordohej. Më mirë të mos flas, nuk u dha dhe kaq. Jam i bindur se nuk do ta kishin quajtur gol nëse do të ndodhte në zonën tonë. Jemi eliminuar nga Kupa, ashtu siç ndodhi edhe në Europa League, për shkak të ndihmave në një aspekt që të gjithë kërkojmë të jetë i paanshëm. Real Madrid nuk ka nevojë për ndihma të tilla, sepse është një klub i madh dhe e ka treguar gjithmonë në historinë e tij. Jemi të zhgënjyer”, u shpreh tekniku bask.

Duke lënë polemikat mënjanë, Alguacil vlerësoi edhe shpirtin luftarak të ekipit të tij në një arenë madhështore.

“Nuk është hera e parë që Madridi përmbys një rezultat në disfavor. Ndihem i trishtuar dhe i zhgënjyer sepse luajtëm për të kaluar më tej, por jam jashtëzakonisht krenar për këtë ekip. Netët historike mbeten në kujtesë vetëm kur arrin finalen, por kjo do të mbetet në zemrën time”, përfundoi ai.