Trotinetët elektrikë të lirë nuk janë gjithmonë të cilësisë së mirë, paralajmërojnë ekspertët

Lajme

Gazeta Express

30/03/2025 18:08

Klubi Touring i Zvicrës (TCS) ka zbuluar një “nivel të ndryshueshëm të cilësisë” gjatë një testi të trotinetëve elektrikë që shiten me çmime nën 500 franga. Nga dhjetë modelet e analizuar, njëri nuk ishte i autorizuar për qarkullim në Zvicër.

Trotinetët elektrikë po shiten gjithnjë e më shumë online dhe në dyqane me çmime nën 500 franga. Çmimi i 10 modeleve të testuara nga TCS varion nga 300 deri në 480 franga. “Këto mjete u krahasuan në disa kritere: manovrimi, pajisjet, funksionalitetet dhe madje edhe siguria,” shpjegoi Jordan Girod, zëdhënës i TCS, gjatë programit “On en parle” më 27 mars 2025, transmeton albinfo.ch.

Një tjetër aspekt i analizuar ishte autonomia e modeleve. “Mesatarja është rreth 25 kilometra, por ajo ndryshon shumë nga një model në tjetrin: arrin vetëm 14 kilometra për modelin më të dobët dhe deri në 40 kilometra për atë më të mirin. Modeli me 14 kilometra autonomi ngre pyetje për përdorimin e tij në përditshmërinë, veçanërisht pasi kjo mund të ulet me ftohtësinë e dimrit,” shpjegon Girod

Girod theksoi se ka kufizime ligjore në Zvicër. “Fuqia nuk mund të kalojë 500 vat. Nëse blini një trotua elektrik që e kalon këtë fuqi, ai është i paligjshëm. Po ashtu, shpejtësia është e kufizuar në 20 km/h.” Një nga modelet e testuara, e blerë në Kinë, ka një shpejtësi deri në 24.3 km/h, duke e bërë atë të paligjshëm për rrugët zvicerane.

Fuqia e modeleve të testuara varion nga 220 në 500 vat. “Kjo mund të ketë ndikim në ngjitje të thella, në gradiente prej 10 ose 15%. Nëse mjeti juaj nuk ka mjaftueshëm fuqi, do të jetë e vështirë të mbani shpejtësinë. Kjo gjithashtu ka çështje sigurie për përdoruesin, sidomos në lidhje me balancën.”