Ujërat e përroit në Malësi të Madhe marrin para makinën, brenda ishin babë e bir

Shqiperi

Gazeta Express

20/11/2022 15:00

Një ngjarje e rëndë është shënuar në ujërat e Përroit të Thate në Bogë. Një makinë në të cilën po udhëtonin babai dhe dy fëmijët është marrë nga uji.

Sipas policisë në momentin që automjeti është marrë përpara nga rrjedha e ujit, vajza ka mundur të dalë. Ajo është ndihmuar nga një banor i zonës dhe tashmë është jashtë rrezikut për jetën.

Nga ana tjetër babai dhe vëllai i saj ende nuk janë gjetur. Polumbarët e RENEA-s dhe një grup i evakuim shpëtimit ndodhet në vendin e ngjarjes dhe po punojnë për gjetjen e tyre.

Njoftimi i policisë

Shërbimet e Komisariatit të Policisë Malësisë e Madhe kanë marrë informacion se në vendin e quajtur “Grykë Lugje”, në njësinë administrative Shkrel, Malësi e Madhe, rrjedha e ujit të përroit kishte marrë përpara një automjet me të cilin udhëtonin tre persona, banorë të zonës. (babai, djali dhe vajza).

Në momentin që rrjedha e ujit ka marrë përpara automjetin që drejtohej nga shtetasi P. R., rreth 50 vjeç, vajza ka mundur të dalë dhe është ndihmuar nga një banor i zonës. Vajza ndodhet jashtë rrezikut për jetën, ndërsa babanë e vajzës dhe vëllanë e saj i ka marrë rrjedhja e ujit.

Në vendngjarje ndodhen  polumbarët e RENEA-s, grupi i evakuim-shpëtimit, grupi alpin i FNSH Shkodër, emergjencat civile dhe shërbimet e Komisariatit të Policisë Malësi e Madhe, të cilët po punojnë për gjetjen e dy shtetasve (babë e bir).

/Gazeta Express