Vaksina kundër grave me efekt tepër negativ tek gratë, zbulojnë shkencëtarët

Keshilla Mjekësore

Gazeta Express

29/04/2025 20:10

Marrja e vaksinës kundër gripit mund të ndikojë në ciklin menstrual të grave, sipas një studimi të ri nga shkencëtarët.

Ekspertët zbuluan se vaksina, e cila u jepet miliona grave çdo vit, e zgjat disi gjatësinë e ciklit menstrual. Në mesatare, periudha mujore e grave të vaksinuara vonohej me rreth një ditë.

Shkencëtarët dyshojnë se kjo ndodh për shkak të ndërveprimit që vaksina shkakton mes sistemit imunitar dhe hormoneve seksuale femërore.

Këto gjetje vijnë pas shumë raportimeve nga gratë që janë ankuar për perioda të vonuara ose më të rënda se zakonisht pas marrjes së vaksinave.

Njerëzit që bëjnë fushatë kundër vaksinave e kanë shfrytëzuar këtë për të përhapur frikën se vaksinat mund të ndikojnë në pjellorinë e grave, megjithëse këto pretendime janë hedhur poshtë nga shkencëtarët.

Sipas ekspertëve të këtij studimi të ri, është shumë e rëndësishme të kuptohet më shumë rreth ndërveprimit mes vaksinave dhe cikleve menstruale për të luftuar hezitimin në rritje ndaj vaksinimit.

Në këtë studim, shkencëtarët nga Oregon Health & Science University në SHBA analizuan të dhëna nga mbi 1,500 gra të moshës 18 deri në 45 vjeç.

Nga këto, 791 kishin marrë vetëm vaksinën kundër gripit, ndërsa 710 kishin marrë njëkohësisht vaksinën e gripit dhe atë kundër Covid-19.

Në mesatare, gratë që kishin marrë vaksinën e gripit përjetuan një zgjatje të ciklit menstrual me gjysmë dite.

Rreth një në 20 gra nga të dy grupet përjetuan ndryshime më të mëdha, me ciklin që u shty me të paktën tetë ditë pas vaksinimit.

Ky ndryshim ndodhte vetëm nëse vaksina jepej në gjysmën e parë të ciklit menstrual — faza folikulare — kur një vezë fillon të piqet për ovulim. Kjo fazë fillon me ditën e parë të menstruacioneve dhe zgjat rreth 13–14 ditë.

Ashtu si në studimet e mëparshme, u gjet se këto ndryshime ishin të përkohshme.

Në revistën JAMA Network Open, ekspertët amerikanë shkruajten se gjetjet e tyre mund të ndihmojnë mjekët të qetësojnë pacientet që shqetësohen për efektet anësore të vaksinës.

Ata shtuan se lidhja mes vaksinave dhe ciklit menstrual është neglizhuar në kërkime dhe duhet të trajtohet me seriozitet.

Ende nuk dihet saktësisht se si vaksinat shkaktojnë këto ndryshime, por fakti që ndikimi ndodh vetëm në gjysmën e parë të ciklit sugjeron se përgjigjja imunitare nga vaksina mund të ndërhyjë në prodhimin e hormoneve, duke ndikuar në cikël.

Autorët shtuan se gratë që dëshirojnë të shmangin këto çrregullime mund të zgjedhin të vaksinohen në një fazë tjetër të ciklit.

Ata gjithashtu pranuan se studimi kishte disa kufizime, përfshirë një numër të vogël dhe jo shumë të larmishëm pjesëmarrësesh.

Gjatësia e ciklit menstrual ndryshon nga një grua te tjetra, por mesatarja është çdo 28 ditë.

Megjithatë, ciklet që zgjasin nga 21 deri në 40 ditë konsiderohen normale.

NHS (Shërbimi Kombëtar Shëndetësor në Britani) këshillon gratë të konsultohen me mjekun e tyre nëse:

Ciklet e tyre bëhen papritur të parregullta dhe janë nën 45 vjeç;

Periudhat ndodhin më shpesh se çdo 21 ditë ose më rrallë se çdo 35 ditë;

Menstruacionet zgjasin më shumë se 7 ditë;

Ekziston një diferencë prej të paktën 20 ditësh mes ciklit më të shkurtër dhe më të gjatë.

Ciklet e parregullta mund të krijojnë vështirësi edhe për gratë që përpiqen të mbeten shtatzënë, pasi bëhet e vështirë të përcaktojnë me saktësi kur ndodh ovulacioni. /GazetaExpress/